Një gjykatë në Vietnam i dha të martën një stjuardi të Vietnam Airlines një dënim me dy vjet burg pasi e shpalli atë fajtor për thyerjen e rregullave të karantinës Covid-19 dhe përhapjen e virusit tek të tjerët.
Duong Tan Hau, 29 vjeç, u dënua për “përhapjen e sëmundjeve të rrezikshme infektive” nga Gjykata Popullore e qytetit Ho Chi Minh, tha Ministria e Sigurimit Publik të Vietnamit në një deklaratë.
Sipas aktakuzës, Hau shkeli rregullat e karantinës 14-ditore të vendit dhe u takua me 46 persona të tjerë pas fluturimit të tij nga Japonia në nëntor. Shkeljet e tij çuan në një karantinë dhe testimin e rreth 2,000 njerëzve të tjerë në qytet, duke shkaktuar një dem që arrin koston e rreth 194,000 dollarëve.
Media shtetërore tha se ai kishte infektuar të paktën tre persona të tjerë.
“Shkelja e Hau ishte serioze, vuri në rrezik shoqërinë dhe rrezikoi sigurinë e komunitetit”, tha deklarata.
Vietnami është vlerësuar për përpjekjet e tij për të përmbajtur virusin përmes testimit dhe gjurmimit masiv dhe karantinimit të rreptë dhe të centralizuar. Shteti ka regjistruar më pak se 2,600 infeksione Covid-19 dhe vetëm 35 vdekje.
