UEFA po punon me komisionet e saj mjekësore, për të siguruar një Europian sa më të qetë dhe për të mos pasur të infektuar gjatë muajit ku futbollistët e përfaqësueseve do të lëvizin në disa qytete të Europës për të luajtur.
Qeveria europiane e futbollit po planifikon të vaksinojë të 600 futbollistët e grumbulluar për kompeticionin, bashkë me stafet e tyre teknike dhe të federatave përkatëse, me qëllim që qëndrimi dhe udhëtimi i tyre të jetë i sigurt.
Ka qenë pikërisht vatra e infeksionit që preku Italinë në eliminatoret e botërorit në fund të muajit të kaluar, që ka bërë drejtuesit e UEFA-s të reflektojnë mbi këtë çështje, duke qenë se te “të kaltrit” u prekën rreth 20 persona staf teknik dhe futbollistë.
Protokollet mjekësore të federatave, të miratuara edhe nga UEFA, nuk ofrojnë siguri për një Europian pa infektime, ndaj qeveria europiane e futbollit e ka të qartë se vetëm me vaksinim dhe imunizim mund t’ia dalë të garantojë një kampionat të qetë.
I shtyrë nga vera e kaluar pikërisht për shkak të koronavirusit, Kampionati Europian do të luhet këtë verë edhe me praninë e tifozëve në shkallët e stadiumit, pasi 8 nga qytetet pritëse kanë marrë zyrtarisht miratimin për hapjen e pjesshme të impianteve përkatëse, ndërsa 4 të tjera kanë afat deri më 19 prill për të plotësuar dokumentacionin e nevojshëm.
