Derek Chauvin, efektivi i policisë 45-vjeçar është shpallur fajtor për vrasjen e afro-amerikanit George Floyd në Mineapolis në majin e vitit të kaluar.
Juria ishte e përbërë nga 5 meshkuj dhe 7 femra, dhe debatoi për rreth 10 orë në dy ditë, fillimisht të hënën, duke u rikthyer sot me vendimin përfundimtar.
Chauvin e kishte deklaruar veten të pafajshëm për akuzat e ngritura, që ishin tre, vrasje e paqëllimshme e gradës së dytë, vrasje e gradës së dytë që nënkupton vrasjen e qëllimtë, dhe të gradës së tretë, ku kjo e fundit nënkupton një veprim të qëllimtë për të shkaktuar dëm, pa asnjë respekt për jetën e tjetrit.
Polici është shpallur fajtor për të trija akuzat, ku dënimi është 40 vjet për vrasjen e gradës së dytë, 25 për atë të gradës së tretë dhe 10 vjet për akuzën e parë.
Vrasja e George Floyd dhe thirrja e tij “Nuk marr dot frymë!”, drejtuar policit, u bënë simbol i një vale proteste që kaloi edhe kufinjtë e Shteteve të Bashkuara, ku akuzave për arrogancën e policisë ndaj personave me ngjyrë iu bashkua edhe një përkrahje globale kundër racizmit, e drejtuar nga lëvizja “Black Lives Matter”.
Verdikti u ndoq edhe nga vetë presidenti Joe Biden, që për rastin ndryshoi edhe takimet e tij institucionale.
