Papa Françesku tha se ishte koha që të gjithë të turpëroheshin për faktin se të paktën 130 migrantë kishin vdekur në Mesdhe ditët e fundit.
“Unë u trondita jashtëzakonisht nga një tragjedi tjetër. Këta janë njerëz që u lutën kot për dy ditë për ndihmë që nuk mbërriti kurrë. Vëllezër dhe motra, ne duhet ta rishikojmë veten për shkak të një tragjedie tjetër. Tani është koha për turp”, tha Papa para qindra qytetarëve të mbledhur në Sheshin e Shën Pjetrit.
Kreu i Kishës Katolike Romake u kërkoi të mbledhurve që të luteshin për të gjithë migrantët që vuajnë në det, si dhe për ata që mund të ndihmojnë, por shikojnë nga ana tjetër, raporton Reuters.
“Ne lutemi, vëllezër dhe motra, për të gjithë ata që vazhdojnë të vdesin në këto udhëtime dramatike, por edhe për ata që mund të ndihmojnë, por preferojnë të shikojnë larg. Ne lutemi në heshtje për ta,” tha Papa.
Pasi disa anije në kërkim të anijeve migratore në Mesdhe gjetën dhjetë trupa të pajetë pranë një anijeje gome të përmbysur në ujërat ndërkombëtare pranë Libisë, organizata humanitare franceze SOS Mesdheut tha se 130 njerëz besohej të kishin vdekur.
Linja e specializuar e ndihmës “Alarm Telefon” raportoi të mërkurën se tre anije me migrantë ishin të rrezikuar dhe vetëm organizata “SOS Mediteran” reagoi ndaj kësaj.
Organizatat humanitare jo-qeveritare akuzojnë Bashkimin Evropian jo vetëm që nuk u ka ardhur në ndihmë viktimave në Mesdhe, por edhe për të parandaluar të tjerët ta bëjnë këtë.
Një zëdhënëse e Organizatës Ndërkombëtare të Migrimit të Kombeve të Bashkuara, Safa Msehli, tha se të gjitha shtetet kishin refuzuar të reagonin për të shpëtuar jetën e më shumë se 100 njerëzve.
Ajo deklaroi se të paktën 453 migrantë kanë vdekur në Mesdhe që nga fillimi i vitit, që është tre herë më shumë se në të njëjtën periudhë të vitit të kaluar.
