Një ngjarje e rëndë kriminale ka ndodhur në Itali në zonën e Ardea, pak kilometra larg Romës, ku një 34-vjeçar qëlloi për vdekje me armë dy fëmijë dhe një burrë të moshuar.
Viktimat janë vëllezërit David dhe Daniel Fusinato të moshave 3 dhe 8 vjeç, si dhe i moshuari Salvatore Ranieri 84 vjeç. Dy fëmijët kanë qenë duke luajtur pak metra larg shtëpisë së tyre kur u qëlluan me armë nga 34-vjeçari. Plumbat i zunë në kokë dhe në zemër. Ndërsa 84-vjeçari mbërriti në park me biçikletë kur u qëllua me 2 plumba.
Autori, i identifikuar si Andrea Pignani, u largua nga vendngjarja dhe u izolua brenda një shtëpie. Forca të shumta të policisë rrethuan banesën dhe i bënë thirrje të vetëdorëzohej.
Pas 3 orësh, policia vendosi të ndërhynte dhe gjeti brenda banesës 34-vjeçarin të vdekur.
Ai kishte vrarë veten me armë pas masakrës që kishte shkaktuar. Autori ishte një banor i zonës dhe ka qenë person problematik. Edhe në të kaluarën ka shkaktuar probleme me banorët e tjerë.
Mediat italiane raportojnë se babai i dy vëllezërve që mbetën të vrarë është me masë sigurie “arrest shtëpie” për drogë. Sipas ANSA, ai është shprehur se autori që i vrau dy djemtë lëvizte i lirë i armatosur dhe askush nuk e kontrollonte.
