Ministrja e Shëndetësisë dhe Mbrojtjes Sociale Ogerta Manastirliu, gjatë fjalës së saj në Kuvend ka bërë me dije sigurimin e 23400 dozave të tjera vaksinash nga kompania Pfizer, pjesë e marrëveshjes që qeveria shqiptare ka me instrumentin COVAX.
“Sjellim sot në Kuvend për miratim një tjetër marrëveshje për vaksinat Pfizer, pjesë e marrëveshjes kuadër që qeveria shqiptare ka me instrumentin Covax, nga i cili do të sigurojmë rreth 1,140,000 doza vaksinash. Nëpërmjet instrumentit COVAX tashmë është bërë e mundur mbërritja e 120 mijë dozave AstaraZeneca, me marrëveshjen sipas dritares së hapur nga ky instrument dhe marrëveshja e radhës nga ky instrument lidhet me kompaninë Pfizer, nga e cila do të sigurojmë në këtë fazë, 23,400 doza vaksine Pfizer Bion-Tech, të cilat pritet të vijnë së shpejti në Shqipëri. Kjo është një tjetër kontratë, përpos kontratës direkte që qeveria shqiptare ka miratuar me Pfizer për rreth 500 mijë doza vaksine, lëvrimi i të cilave ka filluar që në muajin Shkurt”, deklaroi Manastirliu.
Gjatë fjalës së saj në Kuvend, Ministrja e Shëndetësisë foli për lehtësimin e masave antiCovid, por ngriti alertin nga variant Delta, duke bërë thirrje për vigjilencë. Ajo u shpreh se deri më tani nuk është identifikuar asnjë rast i variantit indian në Shqipëri.
“Është e vërtetë që situata në vendin tonë ka tregues pozitiv prej 15 javësh, me një rënie të qëndrueshme të të gjithë indikatorëve. Por ka një alert, që doja të sillja në vëmendjen tuaj është alarm për shkak të variantit të ri Delta, që është identifikuar në vendet e Rajonit. Nga OBSH vlerësohet si një variant i ri, por që ka ngjallur shqetësim duke vlerësuar se është shumë më infektues se variantet e tjera që kanë dominuar deri më tani. Ndaj kërkohet një kujdes maksimal. Ne do të vijojmë të ndjekim rekomandimet e ekspertëve. Po vijojmë me lehtësimin gradual të masave antiCovid. Nga sot zgjatet ora policore deri ne orën 00:00. Ne po vijojmë ta ndjekim situatën në mënyrë të kujdesshme, dinamike, nëpërmjet gjithë rrjetit të survejancës dhe gjithë rrjetin e kujdesit Shëndetësor në vend për të patur një monitorim të kujdesshëm të territorit në çdo bashki. Në laboratorët tanë nuk është identifikuar asnjë rast me variantin Delta, por të gjitha strukturat e sistemit të survejancës janë vendosur në alert për kapjen e hershme të çdo rasti të dyshuar”, tha ministrja Manastirliu mes të tjerash.
Ministrja e Shëndetësisë tha se gjatë stinës së verës do të kemi një fushatë intensive të vaksinimit masiv, teksa ka bërë me dije se gjatë muajit korrik do të ketë ditë të tjera të hapura për vaksinimin.
“Gjatë sezonit të verës do të vijojmë me vaksinimin në komunitet, me vaksinimin në shtëpi për të pamundurit, për të moshuarit kryesisht, për ta shfrytëzuar sa më mirë këtë periudhë për të rritur mbrojtjen nga Covid19. Është e rëndësishme që gjatë këtij procesi të kemi një mbulesë të mirë vaksinale të grupmoshave. Ne do të ulim fashën dhe do të vijojmë gjithashtu me ditët e hapura të vaksinimit edhe në muajin korrik dhe gusht. Kemi në fokus vaksinimin, pasi është e vetmja armë jetëshpëtuese. Ndaj, të gjithë atyre që u jepet mundësia për t’u vaksinuar, ta shfrytëzojnë dhe të mos ketë asnjë neglizhencë”, tha Manastirliu.
Ministrja e Shëndetësisë bëri me dije se në dy ditët e hapura të vaksinimit masiv +18 vjeç janë realizuar rreth 25 mijë vaksinime, ku mbi 17 mijë qytetarë janë vaksinuar për herë të parë. Prej fillimit të vaksinimit janë kryer në total 968,034 doza të vaksinës ndaj Covid-19, ndërsa 403,504 qytetarë i kanë marrë të dyja dozat e vaksinës antiCovid.
