Infektimet me koronavirus në Itali kanë nisur të rriten sërish. 24-orëshin e fundit u regjistruan sërish mbi 1 mijë raste të reja, një nivel që nuk arrihej prej mesit të Qershorit.
Autoritetet italiane e kanë paralajmëruar me kohë kthimin e tendencës së rritjes së infektimeve, teksa thonë se varianti indian është përgjegjës për rritjen më të fundit.
Megjithatë, shtimi i rasteve ende nuk ka ndikuar tek numri i të shtruarve në spitale. Me të dyja dozat e vaksinave, të mjaftueshme për krijimin e imunitetit anti-COVID janë vaksinuar deri tani mbi 34% e popullsisë, një nivel ende shumë i ulët për të frenuar shtimin e fataliteteve.
Rekordi në Britaninë e Madhe
Në Britaninë e Madhe u shënua një tjetër rekord 6-mujor me mbi 32 mijë infektime në një ditë, për shkak të variantit Delta. Vdekjet ditore po ashtu kanë pësuar një rritje të lehtë, e pakrahasueshme megjithatë me proporcionin mes infektimeve dhe vdekjeve ditore në Rusi, ku këtë të enjte pati 734 vdekje dhe mbi 24 800 infektime të reja. Ky krahasim konfirmon sërish se vaksinimi masiv shmang rritjen e fataliteteve.
Sakaq autoritetet franceze u kanë bërë thirrje turistëve, të shmangin Spanjën dhe Portugalinë, ku këto ditë konstatohet tendencë rritje e infektimeve e ushqyer nga qarkullimi i mutacionit indian që përhapet nga turistët britanikë.
Në të gjithë botën u tejkalua shifra e 4 milionë viktimave nga koronavirusi. Organizata Botërore e Shëndetësisë thotë se numri është edhe më i madh se të dhënat zyrtare.
Paralajmërimi i OBSH
Organizata Botërore e Shëndetësisë paralajmëron botën se vaksinat nuk do të jenë të mjaftueshme për të frenuar pandeminë.
Theksohet se varianti Delta është përhapur tashmë në 104 vende të botës, OBSH bëri thirrje për kujdes ekstrem sa i përket heqjes së kufizimeve, ose në të kundërtën do të ketë pasoja.
“U kërkojmë qeverive të tregojnë kujdes maksimal në këtë moment; të mos humbin progresin e shënuar deri më tani, e të rihapin vendet me shumë kujdes. Shpresoj që në kontinentin europian të mos shohim sërish tejmbushje të spitaleve; po kjo edhe mund të ndodhë. Ky virus po evoluon, ky virus po ndryshon dhe ne duhet të tregojmë shumë-shumë kujdes. Ideja se kur jemi të mbrojtur mund t’i rikthehemi jetën normale është shumë e rrezikshme në botë, por edhe në Europë”, u shpreh Mike Ryan, kreu i programit të emergjencave në OBSH.
