Kanë kaluar 76 vjet që nga hedhja e bombës së parë atomike në Hiroshima. Më 6 gusht 1945, gjatë Luftës së Dytë Botërore u hodh bomba e parë atomike mbi qytetin e Hiroshimës në Japoni e që do të pasohej nga një tjetër më 9 gusht në Nagasaki.
Bomba “Little Boy” u hodh nga avioni B-29 Enola Gay i Flotës Ajrore të Shteteve të Bashkuara. Bomba me uranium, me forcën e 13 mijë TNT, shkatërroi 70 për qind të Hiroshimës duke krijuar nxehtësi prej 3000 centigradësh.
Bomba atomike rrafshoi me tokën çdo gjë në një diametër prej 1.5 kilometrash, ndërsa shkaktoi 80 mijë të vdekur vetëm në fazën e parë dhe 140 mijë deri në fund të vitit 1945 nga djegiet dhe helmimet nga rrezatimi.
Ndërkaq, në Nagasaki, kodrat përreth qytetit kufizuan përhapjen e forcës shkatërruese të bombës me fuqi 22 mijë TNT të hedhur nga një lartësi 500 metra, megjithatë rreth 70 mijë persona humbën jetën në fazën e parë dhe gjysma e qytetit u shkatërrua.
Perandori i atëhershëm i Japonisë, Michinomiya Hirohito, në mesazhin e tij më 15 gusht deklaroi dorëzimin e vendit të tij pa kushte, duke thënë se “vazhdimi i luftës do ta shkatërronte popullin japonez”.
Siç thuhet, Hiroshima u vu në shënjestër për shkak të bazave ushtarake, kurse Nagasaki për shkak të industrisë së rëndë. Hedhja e bombës në Nagasaki i dha fund zyrtarisht betejave që vazhdonin në Paqësor.
Kryetari i bashkisë së Hiroshimas, Kazumi Matusi, u ka bërë thirrje liderëve globalë që të eliminojnë armët bërthamore gjatë ceremonisë së mbajtur në këtë qytet.
“Armët bërthamore, të zhvilluara për të fituar luftërat, janë kërcënim për asgjësim të plotë, të cilit mund t’i japim fund nëse punojmë bashkë”, u shpreh ai.
Pasi u mbajt një minutë heshtje, kryebashkiaku theksoi rëndësinë e kombinimit të përpjekjeve individuale veçanërisht në mesin e të rinjve për të inkurajuar shtetet e armatosura të ndryshojnë politikat e tyre.
Ndërsa kryeministri japonez, Yoshihide Suga theksoi nevojën për qasje “realiste” ndaj kontrollit të armëve dhe bëri thirrje për forcim të masave për ndalimin e përhapjes të këtyre armëve.
