Presidenti i vetëshpallur i Afganistanit i tha Euronews se sundimi i talebanëve nuk do të zgjasë shumë, pasi metodat e tyre janë “të papranueshme për njerëzit”.
Amrullah Saleh ishte zv. president para kontrollit të talebanëve në fillim të këtij muaji, gjë që bëri që presidenti Ashraf Ghani të largohej nga vendi.
Saleh, duke folur nga Lugina Panjshir, një zonë e vendit që aktualisht nuk është nën kontrollin e talebanëve, tha për Euronews: “Ligji i talebanëve është Emirati Islamik, i papranueshëm për njerëzit e Afganistanit dhe zgjedhja e një udhëheqësi nga një grup është e papranueshme. E pamundur që sundimi taleban të zgjasë shumë në Afganistan”.
Ai gjithashtu pretendoi se talebanët janë prapa sulmit terrorist të së enjtes në aeroportin e Kabulit, i cili vrau më shumë se 100 afganë dhe 13 ushtarë amerikanë.
I ashtuquajturi grupi i Shtetit Islamik në Afganistan mori përgjegjësinë për shpërthimin.
I pyetur pse nuk u largua nga vendi, ai tha: “Unë jam një ushtar i Ahmad Shah Massoud dhe në fjalorin e tij, nuk kishte asgjë të tillë si ikja, internimi dhe largimi nga kombi në momente të këqija”.
“Nëse do të kisha ikur, mund të isha fizikisht i gjallë, por sapo të arrija në çdo cep të globit, do të kisha vdekur menjëherë”, shtoi ai.
Një vendim që duket se ka forcuar forcat talebane ishte lirimi i mijëra të burgosurve nga qeveria afgane.
“Në pozicionin si zv.president, nuk mund të vija veton ndaj atij vendimi. Fatkeqësisht, amerikanët na kërkuan në një mënyrë shumë të gabuar dhe jo-diplomatike t’i lironim këta të burgosur dhe kërcënuan se do të ndërpresin ndihmën ekonomike, armët dhe ushtrinë për Afganistanin. Ne e bëmë të qartë se nëse i lëmë të lirë këta të burgosur, ata do të ktheheshin për të na luftuar”, u shpreh ai.
Ai shtoi se Bashkimi Evropian “duhet të marrë përgjegjësinë e tij morale dhe mbështetjen për Rezistencën Kombëtare Afgane, politikisht dhe moralisht”.
