Lindita Nikolla u zgjodh si kryetare e Kuvendit, me 79 vota, që nënkupton një rrjedhje votash përtej mazhorancës.
Ndërkohë që në Kuvend po votohej në mënyrë të fshehtë propozimi i Nikollës si kryetare të atij institucioni, nuk munguan disa sinjale interesante edhe tek vendimi për të votuar ose për ta djegur atë të drejtë.
Deputetët e Partisë Demokratike kanë zgjedhur të grisin fletën e votimit, ndërkohë që një qëndrim i tillë nuk pasqyrohet tek disa nga aleatët opozitarë.
Kreu i PBDNJ Vangjel Dule ka zgjedhur të ushtrojë të drejtën e votës, duke deklaruar se votoi kundër, ndërkohë që diçka e tillë u vu re edhe nga Monika Kryemadhi dhe Flamur Çela të LSI-së, të cilët po ashtu deklaruan më pas se votuan kundër.
Ndërkohë, lideri i mazhorancës Edi Rama gjatë votimit të tij me një akt demonstrativ ka zgjedhur të mbledhë votat e grisura nga opozita, duke ia dorëzuar deputetit të PD-së Belind Këlliçi.
Menjëherë pas shpalljes së Nikollës si kryetare e Kuvendit, opozita ka zgjedhur të braktisë sallën e Parlamentit, duke mos qenë të pranishëm gjatë fjalës së kreut tëri të atij institucioni.
Mblodhi fletët e grisura të votimit, Rama: Ky mandat, shumë i rëndësishëm në përpjekjen për të pastruar Shqipërinë
Kryeministri Edi Rama, pas daljes nga Parlamenti, pas zgjedhjes së zonjës Lindita Nikolla si kryetare e Kuvendit, u shpreh se “ishte moment i rëndësishëm dhe i bukur për ne sepse nga sot, Kuvendi ka në krye një grua të admirueshme, kolege të respektuar nga të gjithë dhe një politikane e cila asnjëherë nuk i ka fryrë zjarrit të konfliktit”.
Lidhur me gjestin e tij të mbledhjes së letrave të votimit të grisura nga deputetët e Partisë Demokratike, Rama tha: “Ky mandat do të jetë shumë i rëndësishëm në përpjekjen për të pastruar Shqipërinë. Së shpejti, do të marrim edhe një vendim për ndalimin e qeseve plastike për përdorim individual dhe do të dalim me një paketë të re që zonat turistike dhe rurale të kenë nivel tjetër përgjegjshmërie në raport me mjedisin. Ishte gjest krejt instiktiv, në kushtet kur kjo pjesë e programit është e rëndësishme”.
