Trajneri i Liverpool-it, Jurgen Klopp, e ka cilësuar Manchester City-n si “skuadra më e mirë në Europë”.
Liverpool do të presë City-n këtë diel.
“Kjo është një ndeshje speciale çdo vit dhe duhet të jesh në maksimumin e formës, vetëm kështu mund të kesh një mundësi që të fitosh”, ka thënë Klopp.
“Mendoj se janë skuadra më e mirë në Europë për momentin. Javën e kaluar kanë luajtur kundër Chelsea-t dhe të gjithë flisnin se sa i fortë është Chelsea, por City ka qenë shumë më lart atë ditë”.
Klopp ka folur edhe për humbjen e skuadrës së Pep Guardiola-s kundër PSG-së në Champions League.
“Kanë humbur kundër Paris Saint-Germain dhe unë kam thënë menjëherë pas ndeshjes se ata do të kundërpërgjigjen. Kanë luajtur një ndeshje shumë të mirë. Nuk i shfrytëzuan rastet që kishin dhe PSG ka shënuar, por kur mendon për cilësinë e PSG-së dhe mënyrën si dominoi Manchester City ndaj tyre, kjo tregon shumë për cilësinë e tyre”.
