Italia njoftoi se ka arritur synimin e saj për të vaksinuar 80% të popullatës mbi 12 vjeç, ndërsa protestat kundër pasaportave të vaksinimit vazhdojnë
Sipas të dhënave zyrtare të publikuara të dielën, mbi 43 milionë banorë nga 60 milionë që përbëhet popullsia e Italisë janë tashmë krejtësisht të imunizuar.
Guido Rasi, ish-drejtor i Agjencisë Europiane të Barnave (EMA), i cili aktualisht shërben si këshilltar pranë Komisionerit Italian të COVID-19, tha se shifra 80% nuk ishte “vetëm një prag simbolik”.
Është një nivel në të cilin përllogaritjet tregojnë një pakësim domethënës të virusit dhe ulje drastike të shtrimeve në spitale”.
Protestat vazhdojnë
Pavarësisht lajmit të mirë, Italia përjetoi sërish protesta kundër pasaportave të vaksinimit, protesta të cilat u përshkallëzuan në trazira të dhunshme. Policia e Romës bëri të ditur se arrestoi gjatë këtyre protestave 12 vetë.
Të pranishëm gjatë protestave të dhunshme të së dielës ishin edhe dy drejtuesit e partisë së ekstremit të djathtë, Forza Nuova, Giuliano Castellino dhe Roberto Fiore. Policia italiane njoftoi se edhe ata janë mes 12 të arrestuarve.
Certifikata në Itali, i njohur si “Green Pass”, hyn në fuqi të premten dhe zbatohet për vendet e punës publike dhe private.
Për të marrë pasaportën, qytetarët ose duhet të kenë bërë të paktën një dozë vaksine Covid, të dokumentojnë shërimin nga sëmundja në gjashtë muajt e fundit ose testin negativ në 48 orët e fundit.
