Shqipërisë do t’i duhet të presë përtej datës 14 dhjetor për zhbllokimin e procesit të hapjes së negociatave të anëtarësimit me BE-në, pasi vetoja bullgare ndaj Maqedonisë së Veriut nuk pritet të hiqet përpara kësaj date.
Të paktën kështu ka lënë të kuptohet ligjvënësi bullgar Daniel Lohrer, nga radhët e partisë “Ne vazhdojmë ndryshimin”, i cili ka shanse të jetë ministri i Jashtëm i qeverisë së re që do të krijohet pas zgjedhjeve të së dielës.
Dallimet për gjuhën maqedonase, identitetin dhe të kaluarën historike, si dhe të drejtat e bullgarëve në Maqedoninë e Veriut kanë çuar në vendosjen e vetos nga Sofja zyrtare ndaj Shkupit.
Për Lohrer, nëse mbetet vetëm historia për të zhbllokuar negociatat mes Bullgarisë dhe Maqedonisë së Veriut, atëherë nuk mund të pritet një rezultat i përshtatshëm për të dyja palët.
“Rruga, jo vetëm e Maqedonisë së Veriut, por edhe e Shqipërisë dhe vendeve të tjera të rajonit është në BE dhe Bullgaria dëshiron që kur Maqedonia e Veriut të hyjë në këtë proces, kjo të ndodhë pa shkelur të drejtat e bullgarëve që jetojnë në këtë vend”, u shpreh ligjvënësi bullgar Daniel Lohrer.
Megjithatë, ministri i Jashtëm i Maqedonisë së Veriut, Bujar Osmani ka deklaruar se Shkupi vazhdon të jetë optimist se deri në dhjetor dy vendet mund të arrijnë progres të mjaftueshëm në negociatat për zhbllokimin e procesit të integrimit evropian.
