Nis këtë të hënë qarkullimi i automjeteve në Rrugën e Arbrit. Lajmi është bërë i ditur nga kryeministri Edi Rama, i cili ishte në tunelin e Murrizit, në prani edhe të ministres së Infrastrukturës, Belinda Balluku, për të inauguruar këtë vepër.
Aktualisht, provizorisht kalohet me bajas në Tunelin e Murrizit. “Për shkak të formacioneve gjeologjike komplekse, puna ka ecur më ngadalë dhe përfundon në pranverë, kur rruga do të bëhet për vetëm 47 minuta, nga 1 orë e 20 minuta që bëhet sot ose nga 4 orë që bëhej deri dje”, bën të ditur Rama.
Ministrja Balluku ka treguar se rruga është 69 kilometra e gjatë, por sot janë dorëzuar vetëm 48 kilometra, pasi në disa segmente po punohet ende dhe kjo hapje do të jetë provizore.
Sipas saj në tunelin e Murrizit janë hasur disa problematika për shkak të përbërjes së tokës dhe aty kalimi është devijuar me një bajpas. Po ashtu u bëri thirrje të gjithë shoferëve që të jenë të kujdesshëm, pasi punimet ende nuk kanë përfunduar.
Ndërkohë, në 109-vjetorin e Pavarësisë nisi puna edhe për ndërtimin e aeroportit të Vlorës, që do të jetë edhe më i madhi në vend.
Konsorciumi që do ta ndërtojë është kryesisht shqiptar dhe drejtohet nga sipërmarrësi Behgjet Pacolli, ndërsa operimi është marrë përsipër nga Aeroporti i Mynihut. Kryeministri Rama e quajti Aeroportin e Vlorës një vepër historike jo vetëm për qytetin, por edhe për Shqipërinë dhe Kosovën.
