Mediat greke kanë publikuar fotot e gruas 36-vjeçare nga Shqipëria e cila u vra nga bashkëshorti i saj, 40 vjeçar në Laconia. Autori, i quajtur Festim, ka thënë për mediat se e ka kryer krimin pas një debati të fortë që ka pasur me gruan e identifikuar me emrin Elona. Sipas asaj që ai ka dëshmuar vetë në polici, e ka mbytur gruan me duar.
“Isha i nxehur pasi më ofendoi, e kapa prej fyti dhe e mbyta”, ka thënë ai para policisë. Mediat greke shkruajnë se ngjarja ka ndodhur në dhomën e çiftit, ndërsa dy fëmijët e tyre, 8 dhe 10 vjeç, flinin në një dhomë tjetër.
40-vjeçari është përpjekur që të largohet pas vrasjes, por siç duket është penduar dhe më pas ka marrë vetë policinë në telefon ku ka rrëfyer krimin. Kur kanë shkuar autoritetet e kanë gjetur pa ndjenja dhe e kanë transportuar në spital. Atje ajo u deklarua e vdekur.
Disa orë para ngjarjes, autori kishte postuar një foto në rrjetet sociale ku shfaqej duke përqafuar të shoqen.
Çifti jetonte në Vlachioti prej 3 vitesh dhe punonin në bujqësi. Dy fëmijët e tyre janë marrë në kujdestari nga daja, vëllai i Elonës, i cili jeton në të njëjtin fshat.
Janis Koutsotheodoris, kreu i këtij komuniteti tha për Protothema-n se çifti nuk ishte social. Madje ata janë parë shumë pak në të shkuarën që të dilnin në zonë. Megjithatë ai tha se familja ishte e qetë.
