Popullsia e Bullgarisë ka rënë për 11.5 për qind në dekadën e fundit, kanë treguar të dhënat e parakohshme të regjistrimit të popullsisë.
Numri i popullsisë është zvogëluar për më shumë se 844,000 persona, përkatësisht nga 7.3 milionë në 6.5 milionë, ka thënë Instituti Kombëtar i Statistikave.
Ekspertët kanë thënë se këto shifra janë rezultat i rënies së numrit të lindjeve, shkallës së lartë të mortalitetit, popullsisë në plakje dhe migrimit nga ky vend i BE-së.
Vetëm në kryeqytetin bullgar, Sofje, ka pasur rritje të shkallës së popullsisë.
Rënia më e madh është regjistruar në provincat veriperëndimore, Vidin dhe Montana.
Instituti Kombëtar i Statistikave pret që të dhënat finale të regjistrimit të popullsisë të publikohen në fund të vitit 2022.
Regjistrimi i fundit i popullsisë në këtë shtet është kryer më 2011.
