Turqia e ka ndaluar qarkullimin e anijeve luftarake përmes ngushticave të Bosforit dhe Dardaneleve.
Ankaraja i ka “paralajmëruar vendet fqinje, që të mos dërgojnë anije luftarake përmes Detit të Zi”, tha ministri i Jashtëm turk Mevlut Çavusoglu të hënën në mbrëmje.
Qeveria me këtë vendim i referohet Marrëveshjes së Montreux-së, që i lejon Turqisë të kufizojë në kohë luftë qarkullimin e anijeve luftarake. Ndërkohë janë të paktën katër anije luftarake ruse në Mesdhe që presin lejen e kalimit.
Ngushtica e Bosforit dhe ajo e Dardaneleve lidhin Detin e Zi me Detin Marmara dhe Egje.
Turqia, vend anëtar i NATO-s, ashtu si Rusia dhe Ukraina është vend që shtrihet në brigjet e Detit të Zi. Ankaraja e dënoi ashpër sulmin ndaj Ukrainës javën e kaluar.
Presidenti Rexhep Tajip Erdogan bëri të qartë pozicionin krah Kievit. “Ne e refuzojmë ndërhyrjen ushtarake të Rusisë“, tha Erdogan. Pushtimi është një “goditje e rëndë për paqen dhe stabilitetin në rajon“. Megjithatë konsiderohet, se Erdogan ka një raport të mirë me presidentin rus Vladimir Putin.
