Parlamenti rus votoi unanimisht ligjin që ndëshkon me 15 vjet burg këdo që përhap informacione të rremë mbi sulmet e ushtrisë.
Ligji në fjalë e ndalon përdorimin e fjalëve “luftë në Ukrainë” dhe “pushtimin e trupave ruse”, pasi sipas Moskës, ajo që po ndodh është vetëm një operacion ushtarak.
Ofensiva kundër mediave që nuk i shohin gjërat në këndvështrimin e Kremlinit kërcënon t’u mbyllë gojën zërave të pavarur në Rusi. Në ditët e fundit, media ikonë si stacioni radiofonik “Jehona e Moskës” mbylli dyert. Ai ishte organi mediatik më kritik në Rusi.
“Jemi në një situatë thuajse luftarake dhe qeveria po aplikon hap pas hapi ligje kufizuese që prekin lirinë e shprehjes në tërësi dhe jo vetëm atë të gazetarëve. Por na duhet të pranojmë se e kemi harruar se si jetonim 30 vjet më parë, përpara Mikhail Gorbaçov. Në fakt, po kthehemi në ato kohë”, thotë Alexei Venediktov, kryeredaktor i radios “Ekho Moskvy”.
Dozhd, stacioni televiziv më i pavarur në Rusi, njoftoi të enjten se po ndërpriste operacionet pas kërcënimeve të autoriteteve për mbylljen e tij.
Stacioni, një nga mediat më kritike të mbetura në Rusi, mbajti një edicion lamtumire, me gazetarët që mbajtën fjalime dhe që më pas u panë teksa dilnin nga studioja.
Të premten, autoritetet ruse kufizuan aksesin në faqet e internetit të “BBC”, “Deutsche Welle”, “Meduza” dhe radios “Svoboda”. Nga ana e tyre, vendet perëndimore mbyllën “Russia Today” dhe “Sputnik” në kuadër të sanksioneve.
