Mirënjohje për një akt guximi qytetar
Nga Ruben Avxhiu
Dy shqiptaro-amerikanë bënë bujë këtë javë kur ndërhynë për të shpëtuar një grua aziatiko-amerikane nga një përpjekje e dhunshme për ta grabitur. Sulmuesit e armatosur me thika goditën të paktën 9 herë babain si dhe djalin që përfunduan të dy në spital.
Por akti i tyre ka frymëzuar shumëkënd që të shprehin mbështetje e falenderim për ta.
Më shumë se 165,000 dollarë janë mbledhur, në vetëm dy ditë, për dy shpëtimtarët babë e bir, kryesisht me shuma të vogla nga mijëra aziatiko-amerikanë.
Në dy vitet e fundit që kanë shënuar një rritje të kriminalitetit në Nju Jork, pre e sulmeve të dhunshme kanë qenë në mënyrë të veçantë aziatiko-amerikanët. Në shumë raste që kanë bërë bujë, si shtyrje në shinat e trenit, me pasojë vdekjen, krimet janë kryer nga njerëz që nuk duhej të ishin jashtë burgut.
Lehtësimi i lirimit të të akuzuarve për të mos u mbajtur në burg deri në ditën e gjykimit është futur si ligj me synimin dashamirës që të mos diskriminojë të varfërit që nuk paguajnë dot shumë e nevojshme për lirim me kusht.
Një arsye tjetër ka qenë drejtësia racore. Sipas statistikave djemtë e zinj janë në përqindje shumë të lartë mes atyre të mbajtur në burg deri ditën e gjyqit.
Në realitet kjo ka sjellë lëvizjen e lirë në rrugët e Nju Jorkut të shumë të rinjve me të kaluar të dhunshme, të kërkuar nga policia për krime të ndryshme, përsëritës të sulmeve fizike e përdhunimeve.
Edhe zgjedhja e kryebashkiakut Eric Adams, një ish-oficer policie dhe demokrat që ka qenë kritik ndaj të majtës radikale që kërkonte shkurtime të buxhetit të policisë dhe që është autore e zbutjes së masave ndaj krimit në qytet, ishte reaksion ndaj frikës prej rritjes së krimit.
Mbështetësit e reformave në drejtësi dhe forcat e rendit këmbëngulin se krimi nuk është rritur edhe aq sa të justifikojë kthimin pas. Ata këmbëngulin se problem më i madh mbeten abuzimet e policisë sidomos ndaj komunitetit afrikano-amerikan.
Por, sidomos mes Aziatiko-Amerikanëve por edhe komuniteteve të tjera etnike ka pakënaqësi dhe frikë se lehtësimet po bëhen në kurriz të sigurisë në qytet. Fitorja e Adams kundër kandidatëve të tjerë të majtë ishte prova se edhe shumica e demokratëve e mendojnë kështu.
Ky reagim i komunitetit aziatiko-amerikan për dy shqiptaro-amerikanët heronj është tregues jo vetëm i mirënjohjes për guximin njerëzor e qytetar, por edhe i nevojë së dëshpëruar për një akt sfidues, për një kundërveprim që prej kohësh po pritet nga forcat e rendit dhe drejtësia. Këto të fundit dhe jo qytetarët janë përgjegjës për sigurinë e rrugëve tona.
***
Ngjarja
Një shqiptar nga Mali i Zi është shpallur “Hero” në një titull nderi për akte të veçanta sublime në qytet. Qazim Suljoviç dhe i biri i tij shpëtuan nga grabitja një grua 61-vjeçare nga një sulm me thikë, pranë vendit të tyre të punës.
Louie Suljoviç, një veteran i ushtrisë amerikane 38-vjeçar, ishte duke punuar pas banakut të picerisë së tij “Elmhurst, Louie’s”, kur ai dhe babai i tij panë të moshuarën duke u grabitur nga dy burra të shtunën mbrëma.
Sipas “New York Post” që të dy ndodhen në spital: “Qazimi është në një situatë të rëndë… ndërsa djali i tij Louie po përmirësohet, ai është i shtruar në spital dhe besoj se do të bëhet më mirë”, tha kushërira e Qazimit, Remzija.
Viktima e moshuar u tha policëve se të dyshuarit i ishin afruar asaj nga pas, e shtynë dhe ia hoqën çantën nga krahu duke e kërcënuar me thikë.
Oficerët arritën të arrestonin dy të dyshuarit kur mbërritën mbas 10-15 minutave rreth orës 21:00, ndërsa policët e tjerë dhe autoambalancat u morën me ndihmën e shpejt të dy viktimave.
Robert Whack, 30 vjeç dhe 18-vjeçari Supreme Gooding u arrestuan për sulmin. Të dy akuzohen për grabitje, sulm dhe armëmbajtje për të kryer veprime kriminale.
Whack u gjet gjithashtu me një sasi të madhe të asaj që policët besojnë se ishte heroinë.
Babai dhe djali po trajtohen në spitalin Elmhurst – i njëjti objekt ku piceria e tyre dhuroi ushqime për stafin dhe punonjësit gjatë mbylljes së qytetit gjatë luftës së pandemisë COVID-19 dy vjet më parë (2020).
Sipas të afërmve të tyre, Louie Suljoviç është duke u përmirësuar dhe Qazim Suljoviç është në gjendje të rëndë.
“Ai dhe babai i tij janë ndër më të mirat që ka për të treguar Nju Jorku. I falënderojmë për guximin e tyre dhe i urojmë shërim të shpejtë”, shkroi në Twitter policia e Komisariatit 110 në lagjen e New Yorku ku ndodhi ngjarja.
Një GoFundMe e organizuar nga njujorkezët e krijuar për të ndihmuar dy viktimat me shpenzimet e tyre mjekësore kishte mbledhur deri tani më shumë se 48,000 dollarë që nga e marta kur ndodhi ngjarja.
Piceria do të qëndrojë mbyllur derisa Suljoviç dhe babai i tij shërohen, thuhet në faqen e mbledhjes së fondeve GoFundMe./Illyria
