Mbetjet e fosileve të një zvarraniku të madh fluturues me nofkën “dragoi i vdekjes”, i cili jetoi së bashku me dinozaurët 86 milionë vjet më parë, janë zbuluar së fundmi në Argjentinë. Me një hapje krahësh rreth 9 metra, bëhet fjalë për pterosaurin më të madh (emri i të cilit do të thotë “hardhucë me krahë”, ata janë një rend dinozaurësh të aftë për të fluturuar) i zbuluar në Amerikën e Jugut dhe një nga vertebrorët më të mëdhenj fluturues që ka jetuar ndonjëherë në planetin tonë.
Studiuesit vunë në dukje se shikimi i kësaj bishe duke u rrotulluar në qiejt parahistorikë, ndërsa gjuante gjahun e saj, sigurisht që ishte një pamje e frikshme.
Kjo specie e frikshme vlerësohet të ketë jetuar të paktën 20 milionë vjet përpara se ndikimi i asteroidit në atë që tani është Gadishulli Jukatan i Meksikës të zhdukte rreth tre të katërtat e jetës në planet 66 milionë vjet më parë.
Grupi i paleontologëve, i udhëhequr nga Leonardo Ortiz, i Universitetit Kombëtar të Cuyo në Mendoza, ka zbuluar fosilet e pterosaurit të ri, të quajtur “Thanatosdrakon amaru” (Thanatos nënkupton vdekjen, drakon për dragoin), në Ande, në provincën perëndimore të Mendozës në Argjentinë.
Ortiz shpjegon: “Karakteristikat e këtij fosili nuk ishin gjetur kurrë më parë dhe kjo çon në kërkesën jo vetëm për një specie të re, por edhe për një gjini të re. Më dukej e përshtatshme ta quanim kështu. Është dragoi i vdekjes. Për momentin nuk ka asnjë kafshë tjetër fosile që na kujton atë që sapo është zbuluar”.
Duke iu referuar të dhënave të shkëmbinjve ku mbahej fosili, paleontologët mundën të vërtetonin se zvarraniku ka jetuar rreth 86 milionë vjet më parë, në periudhën e Kretakut, e cila zgjati nga rreth 145 në 66 milionë vjet më parë. Sipas studiuesve që publikuan studimin në “Cretaceous Research”, Thanatosdrakon është “pterosauri më i madh që kapërceu qiejt e Kretakut të Amerikës së Jugut i zbuluar ndonjëherë”. Dhe kërkimet janë vetëm në fillim sepse fosilet e shumta të gjetura do të mund të tregojnë zakonet e jetës së kafshës dhe shumë karakteristika të tjera ende të panjohura.
Duhet mbajtur mend se pterosaurët nuk janë as zogj dhe as lakuriq nate, por zvarranikë që fluturonin në qiellin Jurasik dhe Kretak. Është e mundur që pterosaurët, dinozaurët dhe krokodilët të kenë qenë të lidhur dhe i përkisnin një grupi të njohur si arkosaurët, por kjo ende nuk është konfirmuar. Pterosaurët kanë evoluar në dhjetëra specie. Pas insekteve, ata ishin kafshët e para që fluturuan, jo vetëm duke rrëshqitur, por duke përplasur krahët për ngritje. Ata kishin kocka të zbrazëta që i lejonin të mbanin një peshë pavarësisht nga madhësia e tyre.
