Kryeministrja e Finlandës Sanna Marin ka shprehur mbështetjen për anëtarësimin e Shqipërisë në Bashkimin Europian. Gjatë një vizite zyrtare në Tiranë ku u prit me ceremoni shtetërore nga Kryeministri Edi Rama, Marin theksoi rëndësinë e integrimit në BE jo vetëm të Shqipërisë, por të gjitha Ballkanit pasi të kenë përmbushur kriteret.
“Finlanda është mbështetës afatgjatë dhe i fortë i zgjerimit të Bashkimit Europian. Duam të shohim të gjitha vendet e Ballkanit Perëndimor të anëtarësohen në BE pasi të kenë përmbushur kriteret. Përparësia jonë është të nisim negociatat për anëtarësim me Maqedoninë e Veriut dhe Shqipërinë pa asnjë vonesë. Duam të mbështesim Shqipërinë për anëtarësimin e saj në BE. Shqipëria ka një zë të fortë edhe globalisht. E vlerësojmë rolin tuaj kur bëhet fjalë për përfaqësimet ndërkombëtare”.
Ndërsa kryeministri Rama vlerësoi përpjekjet e Finlandës për të zhbllokuar procesin e hapjes së negociatave.
“Folëm për atë që vjen në ditët e ardhshme apo që nuk vjen, lidhur me çeljen zyrtare të bisedimeve për anëtarësim të Shqipërisë dhe Maqedonisë së Veriut. I thashë Kryeministres që nuk pres asgjë të re në këtë këshill, megjithatë deri në fund, BE, vendet europiane po përpiqen me Bullgarinë për të hapur një shteg të arsyes dhe për ta çliruar procesin”.
Një tjetër diskutim i rëndësishëm është edhe lufta e Rusisë në Ukrainë dhe kërkesa e Finlandës, por edhe Suedisë, për t’u anëtarësuar në NATO.
Kryeministri Rama e konsideroi të rëndësishëm hyrjen e Finlandës në NATO, si një vlerë të shtuar për këtë aleancë. Jo vetëm kaq, por eksperienca e Finlandës, u shpreh Rama, do t’i shërbejë gjithë aleancës ushtarake por edhe vendeve të Ballkanit që është një “hallkë e dobët”, ndërsa theksoi se kërcënimi rus është i real edhe për Ballkanin
“Ne së bashku jemi në një front kundër agresionit rus në Ukrainë dhe Finlanda ka shumë për të treguar dhe mësuar neve dhe të gjithë të tjerëve, pasi për shkak të historisë e njeh shumë mirë agresorin dhe natyrën e tij dhe duke qenë një vend që ka pasur në të shkuarën mundësinë që të nxjerrë shumë mësime nga fqinjësia me Rusinë, mendoj që ka dhe një zë shumë të respektueshëm dhe sa e rëndësishme është lidhja që disa nuk duan ta bëjnë mes asaj që ndodhi në Ukrainë dhe asaj që mund të vijë deri këtu. Ballkani është një hallkë e dobët delikate dhe për këtë arsye eksperienca dhe fjala e Finlandës ka shumë rëndësi për të gjithë komunitetin. Nga ana tjetër mbështesim me gjithë besimin dhe bindjen tonë anëtarësimin e Finlandës dhe Suedisë në NATO. Bëhet fjalë për dy vende që në çdo aspekt janë vlerë e shtuar e aleancës dhe për më tepër në kushtet e sotme dyert e aleancës duhet të jenë të hapura. Madje ne ndihemi të privilegjuar që na jepet mundësia të bëjmë një gjë për Finlandën, kjo nuk është pak”.
Edhe kryeministrja finlandeze theksoi rëndësinë e të qenit të bashkuar përballë Rusisë.
“Diskutimi ynë konfirmon vetëm që duhet të bëjmë më shumë së bashku. Një shumicë mbizotëruese e Finlandës e mbështesin anëtarësimin në NATO. Dua t’ju falenderoj për mbështetjen tuaj të fortë për anëtarësimin në NATO. Shqipëria është mbështetëse e vendosur e dyerve të hapura. Ndërkohë që lufta vazhdon është e rëndësishme të deklarojmë se jemi të bashkuar. Finlanda dhe Suedia do ta bëjnë gjithë aleancën më të fortë. Na duhet të intensifikojmë mbështetjen ndaj Ukrainës dhe sanksionet ndaj Rusisë”, u shpreh Kryeministrja e Finlandës.
