Presidenti Ilir Meta ka dekoruar me titullin e lartë “Nderi i Kombit”, një nga pionierët e Teatrit të Operas dhe Baletit, artistin Agron Aliaj.
Në një postim në rrjetin social Facebook, Meta thekson se Agron Aliaj hyri në historinë e Teatrit të Operas dhe Baletit si pionier i parë i baletit kombëtar.
“Pjesë e një plejade të artë artistësh, që themeluan me pasion dhe sakrifica trupën e baletit shqiptar, mjeshtri i skenës Agron Aliaj hyri në historinë e Teatrit të Operas dhe Baletit, jo vetëm si pionier i parë i baletit kombëtar, por edhe për figurën e rrallë artistike që krijoi dhe që do të mbetej model për koreografët e mëvonshëm”, shprehet ai.
Meta shton se për dekada me radhë, mjeshtëria e tij do të dallohej në çdo pjesë të veprave kombëtare dhe të huaja që u vunë në skenë dhe u duartrokitën nga artdashësit shqiptarë.
“Me mirënjohje për talentin e rrallë dhe kontributin e jashtëzakonshëm të dhënë në formimin dhe edukimin e brezave të rinj të artistëve, që sot interpretojnë krijimet e tij dhe krenohen për veprat e mrekullueshme që ka lënë trashëgim për artin dhe kulturën shqiptare, i akordova të paharruarit Agron Aliaj, Titullin e lartë “Nderi i Kombit”, theksoi Meta.
