90 minutat e kaluara në stol nga Cristiano Ronaldo në derbin e Manchesterit që United e humbi 6-3 ndaj City duket se kanë shkaktuar thyerjen përfundimtare mes kampionit portugez dhe trajnerit Erik Ten Hag, me pasojë lamtumirën e sigurt të CR7 nga “Old Trafford” gjatë merkatos së janarit.
Shtypi anglez është i sigurt për këtë, pasi “justifikimi” i dhënë nga vetë trajneri holandez mbi zgjedhjen për të mos e hedhur numrin 7 në fushë, as në pjesën e dytë, për shkak “të respektimit të karrierës së madhe të Ronaldos”, nuk bind askënd.
Ndaj, ndërsa zërat për destinacionin e mundshëm të ardhshëm të portugezit, pas përfundimit të Botërorit të Katarit, po intensifikohen.
Tema e Ronaldos është shumë e rrahur në rrjetet sociale, edhe për publikimin e një videoje lidhur me atë që ndodhi në tunelin e stadiumit “Etihad”, para derbit të fituar nga skuadra e Guardiolës.
Sekuenca portretizon vetë Ronaldon, i cili, duke synuar të hyjë në fushë, kupton se është gati të shkelë stemën e Manchester City të stampuar përgjatë tunelit. Me një lëvizje të shpejtë të tij, CR7 “driblon” logon e “qytetarëve”, i kalon përreth, duke e shmangur ecjen mbi të, ndryshe nga të lojtarët e tjerë të United.
Një gjest i bukur që tregon lojën e ndershme dhe sjelljen sportive të Ronaldos ndaj një klubi rival historik, i vlerësuar nga tifozët e City dhe futbollit në përgjithësi, por ndoshta jo plotësisht nga ata të Manchester United, tashmë të frustruar nga disfata poshtëruese e fundit.
