Brazili ka marrë një kthesë në të majtë, pasi ish-presidenti Luiz Inácio Lula da Silva mundi në zgjedhjet presidenciale presidentin aktual të ekstremit të djathtë, Jair Bolsonaro.
“I vetmi që fitoi sot është populli brazilian”, deklaroi Lula pak para shpalljes së rezultatit.
Sipas komisionit zgjedhor, në zgjedhje morën pjesë mbi 120 milionë banorë, ndërkohë që votimi u krye në mënyrë elektronike dhe kjo ishte një arsye pse rezultati doli vetëm pas disa orësh.
Pas një fushate përçarëse, e cila pa dy rivalë të hidhur në anët e kundërta të spektrit politik të shkojnë kokë më kokë, Lula fitoi 50.9% të votave, shkruan BBC.
Mjaftoi të mposhte Jair Bolsonaro, mbështetësit e të cilit kishin qenë të sigurt për fitoren.
Por ndarja që kanë nxjerrë në pah këto zgjedhje, nuk ka gjasa të zhduket.
Është një rikthim mahnitës për një politikan që nuk mundi të kandidonte në zgjedhjet e fundit presidenciale në 2018, sepse ishte në burg dhe i ndalohej të kandidonte për postin.
Ai ishte shpallur fajtor për marrjen e ryshfetit nga një firmë ndërtimi braziliane në këmbim të kontratave me kompaninë shtetërore të naftës braziliane Petrobras.
Lula kaloi 580 ditë në burg para se t’i anulohej dënimi dhe t’i rikthehej përplasjes politike.
