Sekretari i Përgjithshëm i NATO-s Jens Stoltenberg, priti këtë të martë në një takim në Bruksel, presidentin shqiptar Bajram Begaj. Në një konferencë të përbashkët për shtyp, Stoltenberg tha se Shqipëria është një aleat i vyer, me një historik të gjatë për mbështetjen e aleatëve dhe partnerëve të NATO-s.
“Shqipëria luan një rol të rëndësishëm për stabilitetin dhe bashkëpunimin në Ballkanin Perëndimor një rajon me rëndësi strategjike për NATO-n”, tha Stoltenberg. Ai tha po ashtu se aleanca është krah Shqipërisë, ndërsa me presidentin Begaj u shpreh se kishte folur edhe për investimin në bazën e Kuçovës.
“Edhe NATO nga ana e vet është e angazhuar ndaj Shqipërisë. Aleatët ishin pranë jush pas sulmeve kibernetik e të vitit të shkuar dhe ekspertët e NATO-s ofruan mbështetjen urgjente. Ne po investojmë gjithashtu në bazën ajrore të Kuçovës që do të rrisë sigurisë tuaj ajrore”.
Ai tha se NATO do të ndihmojë në thjeshtimin e dialogut Prishtinë Beograd dhe theksoi se NATO është e pranishme në Kosovë. Stoltenberg u bëri thirrje palëve për kompromis.
“KFOR po luan një rol të madhe aleatët janë të angazhuar që të kontribuojnë në Kosovë ka prani të konsiderushme të NATO-s në Kosovë, punojmë paralelisht me BE-në në Kosovë. NATO do të vazhdojë të lehtësojë dialogun Prishtinë-Beograd se mendojmë që kjo rruga e zgjidhjes në Kosovë, kemi mundësi historike me përfitim për të gjithë rajonin, mirëpresim qasjen konstruktive. Palët të dëshmojnë gatishmëri për kompromis”.
Ndërsa Presidenti shqiptar nga ana e tij tha se punimet në këtë bazë po ecin sipas programit të miratuar. Begaj tha po ashtu se qeveria shqiptare ka shprehur ambicien, ka paraqitur projektin dhe mirëpret një prezencë detare të NATO-s në portin e ri në Porto Romano.
“Diskutova me Sekretarin e Përgjithshëm, lidhur me ecurinë e punimeve në Bazën Ajrore Taktike të Kuçovës, të cilat po ecin sipas programit të miratuar. Qeveria shqiptare ka shprehur ambicien, ka paraqitur projektin dhe mirëpret një prezencë detare të NATO-s në portin e ri në Porto Romano. Ky port baze detare siguron prezencë detare për Aleancën në rajonin Adriatiko-Jonian, gjithashtu edhe akses në akset kryesore të korridorit tetë. Kjo ndihmon në rritjen e shpejtësisë dhe lëvizshmërisë së Aleancës në krahun lindor dhe Ballkanin Perëndimor”.
