Aktorët amerikanë Matthew McConaughey dhe Woody Harrelson njihen se janë shokë shumë të ngushtë me njëri-tjetrin. Kimia mes të dyve është përcjellë edhe në ekran, në bashkëpunimin që patën vite më parë në sezonin e parë të serialit “True Detective”.
Por së fundmi, McConaughey ka lënë të kuptohet se ai dhe Harrelson mund të jenë vëllezër. Gjatë një interviste në SHBA, ai tha: “Nuk e dimë ku fillon e ku mbaron, gjithmonë vija ka qenë e zbehtë. Fëmijët e mi e quajnë xhaxha Woody, ndërsa fëmijët e tij më quajnë xhaxha Matthew, etj. etj.. Madje kur shohin fotot e vjetra, familja ime mendon se shumë foto të tijat, janë të mijat dhe anasjelltas”.
“Në Greqi, vite më parë, po bisedonim sa të afërta ishin dy familjet tona”, shtoi McConaughey. “Dhe aty ishte edhe mamaja ime, që tha “Woody, unë njihja babin tënd”… Të gjithë aty e morëm vesh se fjala “njihja” kishte shumë ngarkesë brenda”.
“Filluam të zbërthenim atë fjalë dhe zbuluam që gjatë kohës që babai (i Harrelson) ishte në liri me kusht, mamaja dhe babai im ishin duke bërë letrat e divorcit të dytë. Më pas nisëm të mendonim se do të kishte diku fatura në lokalet në Teksasin perëndimor ku ata të dy mund të jenë takuar”.
Matthew tha se ata po diskutojnë nëse do ta bëjnë apo jo testin e ADN-së për të konfirmuar lidhjen mes tyre.
“Shiko, është pak më e lehtë për Woody-n të thotë: “Hajde, le të bëjmë (testet e ADN-së)”, sepse fundja çfarë i kushton atij?” tha ai. “Është pak më e vështirë për mua, sepse mendoj, ‘Prit një minutë, po përpiqesh të më thuash që babai im mund të mos jetë babai im, pas 53 vitesh?’ Është pak më e vështirë për mua.”
Si për ironi të fatit, të dy marrin pjesë në serialin komedi “Vëllezër me nëna të ndryshme” që shfaqet në Apple TV+, një portretizim i miqësisë së tyre.
Ata u njohën fillimisht në vitin 1997 teksa punonin për filmin e Ron Howard, “EDtv”. Përveç serialit “True Detective”, ata kanë luajtur bashkë edhe në filmin “Surfer, Dude”.
