Me ftesë të Presidentit Bajram Begaj, më 10-11 Maj 2023, do të zhvillojë një vizitë zyrtare në Shqipëri, Presidenti i Polonisë, Andrzej Duda, i cili do të shoqërohet në këtë vizitë edhe nga Zonja e Parë e Polonisë, Agata Kornhauser-Duda.
Kjo është vizita e parë zyrtare pas 20 vitesh e një presidenti polak në Shqipëri.
Presidenti i Polonisë pritet të mbërrijë në Shqipëri, më 10 Maj 2023. Ndërsa, më 11 Maj 2023 do të pritet me nderimet e rastit nga Presidenti Begaj, në institucionin e Presidentit të Republikës.
Pas ceremonive të mirëseardhjes, të dy presidentët do të zhvillojnë një takim të veçantë dhe më pas do të kryesojnë delegacionet e të dy vendeve në një takim të zgjeruar, ndërsa në mbarim të takimit, të dy presidentët do të zhvillojnë një konferencë për media.
Në pjesën e dytë të ditës, në orën 16:30, të dy presidentët do të marrin pjesë dhe do t’i drejtohen me mesazhe, forumit të përbashkët ekonomik që do të zhvillohet me pjesëmarrjen e sipërmarrjeve nga të dy vendet. Presidenti Dudaj shoqërohet në këtë vizitë nga një përfaqësi sipërmarrësish polakë, të organizuar nga Agjencia Polake e Investimeve dhe Tregtisë (PAIH).
Gjatë qëndrimit në Shqipëri, presidenti Dudaj do të zhvillojë edhe një vizitë të shkurtër në qytetin e Krujës.
