Keisi Medini ka treguar gjithnjë se sa e lidhur është me të atin, Sabianin. Por, çfarë raporti ka me nënën e saj e cila ka zgjedhur mos të ekspozohet në jetën publike? Këngëtarja ka folur si rrallëherë për marrëdhënien me prindërit e saj që janë divorcuar vite më parë.
E ftuar në ‘Why Not’, këngëtarja tha se marrëdhënien me Sabianin e ka shumë të ngushtë, ashtu edhe me të ëmën, por kjo e fundit nuk dëshiron të bëhet pjesë botës së showbizit, dhe për këtë arsye ajo nuk flet shumë për të.
“Marrëdhënia me mamin është e njëjtë si ajo me Sabianin, por thjesht duke qenë se nuk është pjesë e botës së televizionit kam dashur ta lë si mënjanë, pasi nuk ka qejf që të dalë nëpër portale. E lë mënjanë, pasi dua që ajo të ketë qetësinë e saj, e kam si motër. Jam rritur me dashuri shumë të madhe, babi dhe mami janë 24 orë pas meje.”
Lidhur me raportin që mban Sabiani me nënën e saj, Keisi tha se këta të fundit gëzojnë shumë respekt për njëri-tjetrin.
“Normal që mami dhe babi takohen, kanë një marrëdhënie shumë të mirë, si rrallëherë ndodh në Shqipëri. Kanë respekt për njëri-tjetrin e kanë pasur gjithmonë, ai është një baba perfekt, kujdeset dhe për mamin tim. Është një kryefamiljar perfekt.”
