Ministria e Mbrojtjes e Hungarisë njofton se, një ushtari hungarez, i cili mbeti i plagosur gjatë sulmeve të serbëve në veri të Mitrovicës, ka humbur njërën prej gjymtyrëve.
Një ushtari të KFOR-it, i cili mbeti i plagosur gjatë protestave të dhunshme nga serbët në Kosovë më 29 maj, i është amputuar këmba. Kjo është konfirmuar nga Ministria e Mbrojtjes e Hungarisë, që saktëson se ndërhyrja mjekësore tek ushtari i tyre është bërë gjatë të premtes.
Më tej shtohet se edhe një tjetër paqeruajtës i KFOR-it është në gjendje të rëndë, muaj pas trazirave të dhunshme të 29 majit në Zveçan. Në total nga misioni hungarez në NATO, i angazhuar në Kosovë, u plagosën 27 ushtarë hungarez.
“Për shërimin e tyre, forcat hungareze të mbrojtjes dhe mjekët ushtarakë po bëjnë gjithçka në maksimum. Pavarësisht nivelit të lartë të kujdesit mjekësor, pas një konsulte paraprake me pacientin, duke marrë parasysh rezultatet e trajtimeve të ofruara që nga lëndimi, njërit prej tyre u është dashur t’i bëhet një ndërhyrje për amputim të gjymtyrëve, e cila u krye të premten në Institutin Kombëtar të Rehabilitimit Mjekësor. Operacioni shkoi mirë, gjendja e pacientit është stabile. Është qëllimi i qartë i Ministrit të Mbrojtjes Kombëtare, Kristóf Szalay-Bobrovniczky, dhe Gjeneral Letant, Gábor Böröndi, Shefi i Shtabit të Përgjithshëm të Forcave të Armatosura, të sigurojnë që ushtarët që pësuan dëmtime të përhershme gjatë kryerjes së shërbimit të kenë mundësinë të vazhdojnë të shërbejnë në Forcat e Armatosura Hungareze, nëse kjo korrespondon me qëllimin e këtyre ushtarëve”, deklaroi ministria e Mbrojtjes e Hungarisë.
Më 29 maj, ushtarët hungarez pjesëmarrës në forcën paqeruajtëse të NATO-s (KFOR) u vendosën për detyra të shpërndarjes masive në zyrën e kryetarit të vendbanimit Zveçan në Kosovë. Protestuesit serbë të mbledhur atje dolën në rrugë për shkak të rezultateve të zgjedhjeve të mëparshme dhe më pas sulmuan ushtarët e NATO-s.
Disa nga ushtarët hungarezë të plagosur u dërguan në shtëpi në Hungari me aeroplan të mbrojtjes kombëtare të nesërmen, kohë në të cilën Ministri i Mbrojtjes Kombëtare, Kristóf Szalay-Bobrovniczky, raportoi gjithsej 27 ushtarë hungarez të plagosur.
Shumica e ushtarëve të gardës hungareze tashmë kanë mundur të kthehen në shtëpi, por gjendja e dy prej këtyre ushtarëve është ende e rëndë dhe ata janë ende duke u trajtuar në spital.
Ndërkohë, një tjetër lajm tragjik vjen nga kampi paqeruajtës i KFOR-it. Mediat hungareze raportojnë se një ushtar i kontingjentit të këtij shteti është vetëvrarë në Kosovë. Ngjarja ka ndodhur më 4 korrik, jashtë orarit të shërbimit, njofton ministria e mbrojtjes e Hungarisë. Nuk dihen ende arsyet e këtij veprimi, ndërsa është nisur dhe një hetim.
