Gjykata e Tiranës ka vendosur sot pezullimin e çështjes për shqyrtimin e kërkesës së Lulzim Bashës për miratimin e Kuvendit Kombëtar të 2 shtatorit, duke pranuar kërkesën e grupit të deputetëve të drejtuar nga Gazment Bardhi.
Gjyqtari Niko Rapi, ka konstatuar se pa u zgjidhur konflikti që është në Gjykatën e Lartë mbi Kuvendin Kombëtar të 11 dhjetorit, nuk mund të zhvillohet dhe të konsiderohet i vlefshëm asnjë Kuvend Kombëtar i mëpasshëm apo statut i ndryshuar.
Në këtë mënyrë, statuti i dalë në 2 shtator, përmes të cilit Lulzim Basha u caktua edhe kryetar i Grupit Parlamentar nuk është miratuar dhe procesi është pezulluar deri në shprehjen e Gjykatës së Lartë.
Grupi i deputetëve të mandatuar nga Këshilli Kombëtar i thirrur nga Sekretari i Përgjithshëm i PD Gazment Bardhi është njohur si palë nga Gjykata e Tiranës.
Ata kanë kërkuar nga gjykata pezullimin e çështjes, kërkesë që është pranuar nga Gjykata e Shkallës së Parë Tiranë.
Çlirim Gjata deklaroi se ajo pjesë që e konsideronte veten PD, tashmë ka rënë.
“Kërkuesi kërkon pezullimin, atë që kërkon edhe kundërshtari. Erdhën te ne, aty ku po vinë të gjithë.”
Ndërkohë, nga ana tjetër, përfaqësuesi ligjor i Lulzim Bashës, Indrit Sefa deklaroi se vendimi i sotëm nuk sjell asnjë lloj problematike në organizmin e brendshëm të Partisë Demokratike.
“Ne do të vijojë të funksionojë në bazë të statutit të 2 shtatorit”, deklaroi ai për mediat.
Kurse, përfaqësuesi i ankimimit të bërë nga Gazment Bardhit, Marash Logu, deklaroi pas përfundimit të seancës se, përmes këtij vendimi, Gjykata e Tiranës vendosi të lërë të mbyllur mundësinë që Basha, të bëhej kreu i Grupit Parlamentar të PD-së.
“Gjykata e Tiranës vendosi sot që ëndrra e Lulzim Bashës për t’u bërë kryetar i Grupit parlamentar të Partisë Demokratike, kundër vullnetit të demokratëve, do vazhdojë të qëndrojë e mbyllur në sirtarin e Lindita Nikollës.”
