Partia Demokratike dërgoi këtë të mërkurë në Gjykatën Kushtetuese, marrëveshjen për emigrantët mes Shqipërinë dhe Italisë.
28 deputetë demokratë kërkojnë nga gjykata deklarimin të papajtueshëm me Kushtetutën të këtij protokolli, ndalimin si dhe pezullimin e procedurave për ratifikimin e tij nga Kuvendi.
Sipas tyre, marrëveshja është negociuar dhe nënshkruar në mungesë të autorizimit nga Presidenti i Republikës, që bie ndesh me Kushtetutën, Konventën e Vjenës për të Drejtën e Traktateve dhe jurisprudencën e Gjykatës Kushtetuese.
“Nëpërmjet kësaj padie ne kemi kërkuar deklarimin si të papajtueshëm me Kushtetutën të protokollit ndërmjet qeverisë së Republikës së Italisë dhe Këshillit të Ministrave të Shqipërisë, që ka të bëjë me protokollin për forcimin e bashkëpunimit në fushën e migracionit. Po ashtu kemi kërkuar edhe pezullimin e procedurave për ratifikimit të protokollit mes qeverisë së Italisë dhe Këshillit të Ministrave të Shqipërisë. Në cilësinë e deputetes së Lezhës dhe qarkut Lezhë padyshim që bashkë me grupin parlamentar kemi vendosur që kësaj t’i shkojmë deri në fund”.
“Sot sapo depozituam padinë sepse ne padyshim që jemi në mbrojtje të interesit qytetar, në mbrojtje të të drejtave të njeriut dhe në këto kushte presim që Gjykata Kushtetuese të vendosë në një shqyrtim të shpejtë. Kjo nuk ka të bëjë fare në marrëdhënien tonë me Italinë, përkundrazi, do të vijojnë të jenë gjithmonë e më të mira, por ne do të presim vendimin e GJK, duke shpresuar që të japë sa më shpejt në lidhje me kushtetutshmërinë edhe a pajtohet ky protokoll me Kushtetutën e Republikës së Shqipërisë”, tha deputetja Lindita Metaliaj.
Një ditë më parë marrëveshja në fjalë u miratua nga qeveria italiane.
