Ish-senatori dhe prokurori zviceran Dick Marty ka ndërruar jetë të enjten në moshën 78-vjeçare. Lajmi për vdekjen e Marty-t u konfirmua edhe nga partia e tij, radikalët e qendrës së djathtë.
Por kush ishte Dick Marty?
Marty u lind në kantonin jugor italishtfolës të Ticinos, ku shërbeu si zëvendësprokuror publik, më pas prokuror publik nga viti 1975-1989. Ai ishte anëtar i qeverisë kantonale të Ticinos nga viti 1989 deri në 1995.
I zgjedhur në Senatin Zviceran në vitin 1995, ai ishte anëtar i Partisë Radikale të qendrës së djathtë. Ai dha dorëheqjen në vitin 2011. Ndër nismat e tij ishin instalimi i një prokurori federal të pavarur dhe dekriminalizimi i abortit. Ai u zgjodh në asamblenë parlamentare të Këshillit të Evropës në vitin 1999 dhe kryesoi Komisionin për Çështjet Ligjore dhe të Drejtat e Njeriut nga viti 2005 deri në 2008. Ai doli në pension në vitin 2011.
Në emër të komitetit, ai hetoi burgjet sekrete të CIA-s në Evropë, duke publikuar një raport në vitin 2006 që thoshte se 14 vende kishin bashkëpunuar me SHBA-në në një “rrjetën e merimangës” të abuzimeve të të drejtave të njeriut. Marty tha se vende të tjera, përfshirë Zvicrën, ishin përfshirë në mënyrë aktive ose pasive në ndalimin ose transferimin e personave të panjohur.
Në vitin 2010 ai publikoi një raport mbi trafikimin e dyshuar të organeve në Kosovë, i cili implikonte anëtarë të rangut të lartë të Ushtrisë Çlirimtare të Kosovës (UÇK). Pas raportit të tij u themelua Gjykata Speciale me seli në Hagë ku po gjykohen ish-krerët UÇK. Të gjitha akuzat për trafikim organesh janë hedhur poshtë.
Kryeministri Edi Rama, në tetor në Këshillin e Evropës, kërkoi anulimin e raportit të Dick Marty-t për trafikun e organeve në Shqipëri dhe Kosovë, duke theksuar se ai është ‘Fake news’ më i rëndë në histori që baltos luftën e një kombi për liri.
Marty u kthye në qendër të vëmendjes në vitin 2022 kur mediat zvicerane raportuan se ish-senatori zviceran pranoi kërcënime nga radikalët e shërbimit inteligjent serb (BIA) dhe mbrohej nga policia e shtetit zviceran, ndërsa dyshohej se plani ka qenë që ai të likuidohej nga vrasës profesionistë të angazhuar nga shteti serb për t’ia ngarkuar përgjegjësinë shqiptarëve.
