Aktor izraelit, Idan Amedi i njohur më së shumti për rolin e tij si ushtar i forcave speciale në serialin hit të Netflix “Fauda”, është plagosur rëndë në Gaza, ndërsa luftonte për ushtrinë izraelite kundër Hamasit, sipas familjes së tij dhe spitalit ku ai po trajtohet.
35-vjeçari, është në gjendje kritike në ICU në Qendrën Mjekësore Sheba Tel Hashomer pranë Tel Avivit, tha një zëdhënës i spitalit për CNN. Megjithatë, babai i yllit i tha faqes izraelite Walla: Nuk ka asnjë rrezik për jetën e tij.
Aktori kishte dalë vullnetar për të luftuar për ushtrinë izraelite në Gaza pas sulmeve të Hamasit në Izrael më 7 tetor, sipas bashkëkrijuesve të “Fauda”, Lior Raz dhe Avi Issacharaoff.
Amedi fitoi famë në vitet 2010 si kantautor përpara se t’i bashkohej kastit të “Fauda” në 2017.
Seriali Fauda
Fauda është një serial televiziv izraelit i krijuar nga Lior Raz dhe Avi Issacharoff bazuar në përvojat e tyre në Forcat e Mbrojtjes të Izraelit. Seriali u shfaq premierë më 15 shkurt 2015. Ai tregon historinë e Doron, një komandant i njësisë Mista’arvim dhe ekipit të tij – në sezonin e parë, ata gjuajnë një krye-terrorist të Hamasit të njohur si “Pantera”.
Sezoni i parë u filmua në Kafr Qasim gjatë Luftës së Gazës 2014. Ai u shfaq premierë më 15 shkurt 2015. Sezoni i dytë u shfaq premierë më 31 dhjetor 2017.
Sezoni i tretë është i vendosur në Rripin e Gazës dhe është transmetuar në vitin 2019 dhe 2020. Ndërkombëtarisht, seriali shfaqet në Netflix, dhe sezoni i katërt u transmetua në fillim të vitit 2023.
