Të shtunën do të mbahen zgjedhjet parlamentare dhe presidenciale që mund të ndryshojnë botën dhe jo, nuk mbahen në Amerikë. Kështu i cilëson CNN zgjedhjet e të së shtunës në Tajvan, një ishull që Kina e konsideron si territorin e saj. Rezultati i zgjedhjeve do të reflektohet shumë më larg se ky ishull, por mbi të gjitha do të ndiqet me kujdes në Kinë.
CNN shkruan se shumica dërrmuese e njerëzve në Tajvan nuk duan të sundohen nga Pekini. Por nga ana tjetër CNN vlerëson se presidenti kinez Xi Jinping po bëhet gjithnjë e më shumë agresiv ndaj fqinjëve të tij. Zgjedhjet e të shtunës në pushtet në Tajvan për Kinën duket se kanë vetëm dy opsione: Luftë ose Paqe.
Tajvani është burimi kryesor i tensionit mes Kinës dhe SHBA-së, vendi që i jep ishullit mbështetjen më të madhe nga të gjitha vendet e botës dhe gjithashtu e furnizon me armë. Për këtë shkak marrëdhëniet mes dy superfuqive janë lëkundur prej disa vitesh. Thuhet se mënyra sesi Kina do t’i përgjigjet zgjedhjeve të vendosura nga votuesit në Tajvan këtë fundjavë që vjen do të jetë një provë nëse Pekini dhe Uashingtoni mund të mbajnë nën kontroll tensionet apo nëse do të fillojnë konfrontime të mëtejshme që mund të përshkallëzojnë edhe në një konflikt.
Në zgjedhjet presidenciale zgjidhet pasardhësi i Tsai Ing-wen, i cili ishte në detyrë për 8 vjet dhe nuk ka më të drejtë të kandidojë. I preferuari i tij është Lai Ching-te, nënkryetari aktual i DPP, një parti që mbron sovranitetin e Tajvanit. Doktori i kthyer në politikan e ka përshkruar më parë veten si një “punëtor praktik për pavarësinë e Tajvanit”, një pretendim që ka zemëruar Pekinin dhe ka shqetësuar Uashingtonin.
Gjatë fushatës aktuale, ai e zbuti qëndrimin e tij dhe premtoi se, ashtu si presidenti në largim Tsai, do të qëndronte për “status quo”-në dhe do t’i ofronte Kinës bisedime në përputhje me parimet e barazisë dhe dinjitetit. Por Pekini e refuzoi ofertën e tij dhe e akuzoi për “shkaktim lufte” dhe “shkatërrim të paqes përgjatë ngushticës së Tajvanit”.
Kundërshtari kryesor i Lait është Hu Yu-ih, një ish-polic dhe kryetari aktual i qytetit të Nju Taipei nga Kuomintang (KMT), e njohur gjithashtu si Partia Nacionaliste Kineze, e cila sundoi Republikën e Kinës nga viti 1928 deri në 1949. Pavarësisht historisë së saj të luftës me ideologjinë aktuale në Pekin, KMT tani është partia kryesore opozitare në Tajvan, e cila tradicionalisht mbron marrëdhënie më të ngushta me Kinën.
