Në kuadër të operacionit policor i koduar “Brothers” policia ka arrestuar 20 vjeçarin, Jesar Shabaj dhe ka shpallur në kërkim vëllain e tij 23 vjeç, Jaser Shabaj, pasi janë kapur me 2 mina me telekomandë të cilat do të përdoreshin për ngjarje të rënda kriminale. Dy vëllezërit ishin banues në Shkodër.
Sipas policisë, për këtë rast janë sekuestruar 2 mina me telekomandë, me eksploziv C4 me peshë 300 gram, të programuara për shpërthim në distancë, që do të përdoreshin nga dy vëllezërit.
“Gjatë veprimeve hetimore të kryera në kuadër të procedimit për këtë rast, janë gjetur dhe sekuestruar, në cilësinë e provës materiale, 2 mina me telekomandë, me lëndë eksplozive C4 peshë 300 gram, të programuara për shpërthim në distancë (të pajisura me aparat celular dhe me kapsolla detonatore), të cilat dyshohet se do të përdoreshin për kryerjen e ngjarjeve të rënda kriminale. Gjithashtu janë sekuestruar aparati celular i 20-vjeçarit të ndaluar si dhe një përforcues grushti (dorezë metalike)”, njofton ndër të tjera policia.
Vijojnë hetimet, për të dokumentuar implikimin e personave të tjerë, të përfshirë në këtë veprimtari kriminale.
