Mediat italiane kanë zbuluar detaje të reja nga rrjeti italo-shqiptar që kishte mundur “të shtinte në dorë”, 31 restorante dhe 2 hotele në një nga zonat më të pasura të Firences. Ata akuzohen për krijimin e një skeme të pastrimit të parave.
Në pranga janë vënë sipërmarrësi Alessandro Bigi, president i ekipit të futbollit Ischia, ish-portieri i Napolit dhe Fiorentinës, Pino Taglialatela, nga i cili Bigi bleu aksionet e klubit me para që besohet të jenë si rezultat i të ardhurave të paligjshme.
Nën akuzë janë vënë edhe shqiptari Elouert Kamani dhe bashkëkombës të tjerë të tij si Albiona Ziaj, Redon Marku, Musa Kakuli, Samir Houjeiri, Eros Giona, Orkes Kamani, etj. Klubi i futbollit u ble zyrtarisht për 9 mijë euro, por në fakt u paguan 100 mijë euro të fshehura si donacione apo të justifikuara me fatura false.
Qendra e rrjetit italo-shqiptar ndodhej në restorantin “Il Cavallino” ku kishin mundur të riciklonin mbi 10 milionë euro, të cilat ishin riinvestuar në blerje të furishme të bizneseve dhe restoranteve në qendër të Firences. Një kamera e fshehur nga hetuesit e Guardia di Finanza ka regjistruar prej kohësh praktikën e dorëzimit të parave “nën tavolinë”. Rrjeti pastronte para me bizneset që kishte dhe me ato blinte biznese të tjera.
Operacioni është shtrirë edhe në Shqipëri ku janë kryer kontrolle në Vlorë, Elbasan dhe Durrës në bashkëpunim me SPAK dhe BKH. Synimi i hetuesve është të gjurmojnë origjinën e lumit të parave. Përveç 31 restoranteve, 2 hoteleve dhe një klubi futbolli ata kishin blerë edhe një fabrikë birre dhe një biznes të makinave me qira.
Sakaq, edhe SPAK ka regjistruar një procedim penal për hetimin e një organizate kriminale në kuadër të pastrimit të parave.
Sipas njoftimit të SPAK, bëhet fjalë për një shumë prej 13.5 milion eurosh në 12 vite përmes mashtrimit.
“Në bashkëpunim me Prokurorinë Publike të Firenzes, koordinuar nga Eurojust, janë kryer kontrolle në 4 qytete të Shqipërisë dhe 23 kontrolle në disa qytete të Italisë. Është zbuluar një investim prej 13.5 milionë euro në 31 restorante, 2 hotele dhe biznese të tjera të ndryshme. Hetimi po vijon në mbledhjen e provave dhe përgjegjësinë penale të subjekteve nën hetim”, njofton SPAK.
