Vetëm pak orë pas njoftimit të Kryeministrisë për vakancën e krijuar, Presidenti Bajram Begaj ka dekretuar 4 gushtin 2024 për mbajtjen e zgjedhjeve të parakohshme në Bashkinë e Himarës.
KQZ vendosi pikërisht këtë të premte pavlefshmërinë e mandatit të Fredi Belerit në zgjedhjet e 14 majit.Sakaq, sipas ligjit në fuqi Fredi Beleri ka 30 ditë kohë që të ankimojë vendimin e marrë nga KQZ në KAS. Kreu i PBDNJ-së, Vangjel Dule, që ishte i pranishëm përkrah Belerit në mbledhjen e paradites së sotme, ka paralajmëruar avokatët e tij do të ndjekin çdo procedurë për ta vijuar më tej betejën ligjore.
“Presidenti i Republikës Bajram Begaj dekreton zgjedhjet për kryetar bashkie në bashkinë Himarë.
Sot, Këshilli i Ministrave njoftoi zyrtarisht Presidentin e Republikës për vakancën e krijuar në bashkinë Himarë për shkak të konstatimit të pavlefshmërisë së mandatit të fituar nga z. Dhionisios (Alfred) Petro Beleri dhe kërkoi caktimin e datës së zgjedhjeve, brenda afateve që përcakton Kodi Zgjedhor.
Kryetari i zgjedhur i bashkisë Himarë është gjendur nga Komisioni Qendror i Zgjedhjeve në kushtet e pavlefshmërisë së mandatit, për shkak të dënimit me vendim të formës së prerë për veprën penale të “korrupsionit aktiv në zgjedhje”, të parashikuar nga neni 328 i Kodit Penal të Republikës së Shqipërisë.
Presidenti i Republikës, Sh.T.Z.Bajram Begaj thirri në konsultë z. Ilirjan Celibashi, Komisioner Shtetëror i Zgjedhjeve për t’u informuar lidhur me kapacitetet dhe gadishmërinë e institucionit menaxhues të zgjedhjeve, për zhvillimin e zgjedhjeve në këtë bashki, brenda kornizës kalendarike të Kodit Zgjedhor.
Pas kësaj konsulte, Presidenti i Republikës, Sh.T.Z.Bajram Begaj dekretoi datën 4 gusht 2024 për zhvillimin e zgjedhjeve për kryetar bashkie në bashkinë Himarë, si alternativa më e mirë që pajton nevojën për përgatitjen dhe zhvillimin e një fushate të rregullt zgjedhore dhe nevojën për përgatitjen optimale të administratës zgjedhore, me kushtet, rrethanat dhe ngarkesën që sjell sezoni turistik për bashkinë Himarë, si njësi bregdetare e qeverisjes vendore”, njofton Presidenca.
