Kuajt janë shumë më të zgjuar sesa mendohej më parë, mund të planifikojnë përpara dhe të mendojnë në mënyrë strategjike, thanë shkencëtarët, pasi një studim tregoi se kafshët performuan më mirë sesa pritej në një lojë komplekse të bazuar në shpërblime.
Studiuesit zbuluan se kur iu mohuan shpërblimet për mosrespektimin e rregullave të lojës, kuajt ishin në gjendje të ndryshonin menjëherë strategjitë.
“Kjo tregon se kafshët kanë aftësinë për të menduar dhe planifikuar përpara – diçka që më parë konsiderohej se ishte përtej kapacitetit të tyre”, thanë shkencëtarët ne Universitetin Nottingham Trent (NTU), Angli.
“Njohja se si mësojnë kuajt mund t’i ndihmojë kujdestarët t’i trajnojnë ata në mënyrë më njerëzore dhe të përmirësojnë mirëqenien e tyre”, shtoi ekipi.
“Kuajt nuk janë gjeni natyrorë, ata mendohen si mediokër, por ky studim tregoi se ata nuk kanë inteligjencë mesatarë – dhe në fakt janë më të avancuar nga pikëpamja njohëse”, tha Carrie Ijichi, një pedagoge me përvojë në shkencën e kuajve në NTU.
“Kafshët zakonisht kanë nevojë për disa përsëritje të një detyre për të përvetësuar gradualisht njohuri të reja, por kuajt tanë përmirësuan menjëherë aftësitë – kur ne përfshimë një kosto për gabimet. Kjo sugjeron që kuajt e dinin gjatë gjithë kohës se cilat ishin rregullat e lojës”, tha Louise Evans, një kandidate për doktoraturë në Shkollën e Shkencave të Kafshëve, Rurale dhe Mjedisore të NTU-së.
Studiuesit thanë se gjetjet, të publikuara në revistën “Applied Animal Behavior Science”, sugjerojnë se kuajt kanë aftësinë të formojnë një model të brendshëm të botës rreth tyre – për të marrë vendime dhe bërë parashikime, një teknikë e njohur si të mësuarit e bazuar në model.
Më parë mendohej se mësimi i bazuar në modele ishte shumë më kompleks për kuajt, pasi ata kanë një korteks para-frontal të pazhvilluar – një pjesë e trurit që lidhet me të menduarit strategjik.
