Ish-ministri i Transporteve dhe ish-deputet i LSI, Edmond Haxhinasto, është paraqitur ditën e sotme në SPAK.
Ende nuk dihen detaje mbi thirrjen e tij në SPAK, por kujtojmë se në vitin 2018 Haxhinasto është paraqitur tek Prokuroria e Krimeve të Rënda, për t’u pyetur për procedurat e rrugës Tiranë-Elbasan.
Hetimet për këtë çështje nisën pasi Damian Gjiknuri bëri kallëzimin në prokurori në dhjetor të vitit 2017, ç’ka lë të kuptohet se kjo dosje nisi të aktivizohet pas prishjes se koalicionit PS-LSI.
Ndërkohë, nga mesazhet që SPAK gjeti në celularin e Monika Kryemadhit kishte biseda me Haxhinaston për ndryshimin e biznesmenit që do të kishte akses në biznesin e fibrave të internetit, të shtrira në të gjithë vendin.
Nga mesazhet dhe emailet që u gjetën në telefonin e Kryemadhit kuptohej se procedurat e aplikimit për licencën e fibrave optike hartoheshin jashtë institucioneve shtetërore dhe më pas zbatoheshin nga ministria që drejtohej nga Haxhinasto.
