Konsumatorët e kafesë së shpejti mund të presin që pirja e tyre e mëngjesit të jetë më i shtrenjtë, pasi çmimi i kafesë ka arritur një nivel të lartë të të gjitha kohërave në tregjet ndërkombëtare të mallrave.
Të martën, më 10 dhjetor 2024, çmimi i arabica-s, që përbën pjesën më të madhe të prodhimit botëror, kaloi 3.44 dollarë për gjysmë kilogrami lëndë të parë, duke u rritur me më shumë se 80 për qind këtë vit. Ndërkohë, çmimi i robusta-s ka shënuar një nivel të ri në shtator.
Kjo vjen pasi tregtarët e kafesë presin që të korrat të tkurren, me shkak dy prodhuesit më të mëdhenj në botë, Brazilin dhe Vietnamin, të cilët u goditën nga moti i pafavorshëm. Paralel me këtë situatë, kërkesa për kafe vijon të rritet.
Një ekspert tha se markat e kafesë po konsiderojnë një rritje të çmimeve në vitin e ri.
Ndërsa vitet e fundit pjekësit e mëdhenj të kafesë kanë qenë në gjendje të frenojnë rritjen e çmimeve për t’i mbajtur klientët të kënaqur dhe për të ruajtur pjesën e tregut, kjo duket se do të ndryshojë, thotë Vinh Nguyen, CEO i Tuan Loc Commodities.
“Markat si JDE Peet apo Nestle kanë marrë një goditje nga çmimet më të larta të lëndëve të para,” tha ai.
“Tani ata janë pothuajse në një pikë kthese. Shumë prej tyre po mendojnë për rritjen e çmimeve në supermarkete në tremujorin e parë të 2025.”
Në një event investitor në nëntor, një drejtues i lartë i Nestle tha se industria e kafesë po përballet me “kohë më të vështira”, duke pranuar se kompania e tij do të duhet të rregullojë çmimet dhe madhësinë e paketimit.
“Ne nuk jemi të imunizuar ndaj çmimit të kafesë”, tha David Rennie, kreu i markave të kafesë në Nestle.
Thatësira dhe shi i dendur
Rekordi i fundit i çmimit të kafesë u vendos në vitin 1977 pasi reshjet e pazakonta të borës shkatërruan plantacione në Brazil.
“Shqetësimet për të korrat e vitit 2025 në Brazil janë shtytësi kryesor,” tha Ole Hansen, kreu i strategjisë së mallrave në Saxo Bank.
“Vendi përjetoi thatësirën më të keqe në 70 vjet gjatë gushtit dhe shtatorit, të ndjekur nga shira të dendur në tetor, duke rritur frikën.” Dhe nuk janë vetëm plantacionet e kafesë në Brazil, të cilat prodhojnë kryesisht kokrra arabica, ato që janë goditur nga moti i rënduar.
Rezervat e robusta-s do të pakësohen gjithashtu pasi plantacionet në Vietnam, prodhuesi më i madh i këtij varieteti, u përballën gjithashtu me thatësirën dhe reshjet e mëdha.
Kafeja është malli i dytë më i tregtuar në botë për nga vëllimi, pas naftës së papërpunuar dhe popullariteti i saj po rritet. Për shembull, konsumi në Kinë është dyfishuar në dekadën e fundit.
“Kërkesa për këtë mall mbetet e lartë, ndërsa inventarët e mbajtur nga prodhuesit dhe pjekësit raportohet se janë në nivele të ulëta,” tha Fernanda Okada, analiste e çmimeve të kafesë në S&P Global Commodity Insights.
“Trendi rritës i çmimit të kafesë pritet të vazhdojë edhe për disa kohë”, shtoi ajo.
