Dhënia e nënshtetësisë shqiptare dy vëllezërve indianë, të kërkuar për mashtrim në vendin e tyre, duket se ka përfshirë një sërë emrash të rëndësishëm politikanësh. Ata e kanë marrë nënshtetësinë shqiptare në kohën kur në krye të Ministrisë së Jashtme ka qenë Ditmir Bushati.
Madje atë kohë njëri prej vëllezërve, Nitin Sandesara është bërë konsull nderi i Shqipërisë në Nigeri.
Për t’u shmangur nga spiralja e këtij skandali, Presidenti Ilir Meta ka dhënë një sqarim zyrtar, duke thënë se:-“Janë zbatuar procedurat ligjore bazuar në pikën 7, të nenit 9 të ligjit nr. 8389, datë 05.08.1998 “Për shtetësinë shqiptare” të ndryshuar, me propozimin e Ministrisë së Turizmit dhe Mjedisit, “për shkak të eksperiencës në investime dhe historikut të sipërmarrjeve të suksesshme jashtë Republikës së Shqipërisë dhe për shkak të angazhimit të tyre për realizimin e investimeve të rëndësishme elitare në vendin tonë”.
Por çfarë e lidh ministrin e Mjedisit, Blendi Klosi me dy vëllezërit indianë?
Blendi Klosi i është shmangur sot interesit të gazetarëve lidhur me sugjerimin ndaj Presidentit për dhënien e shtetësisë të dy vëllezërve indianë, investitorë në Shqipëri.
“Do të kemi patjetër një përgjigje për të gjithë ju. Do t’jua a japim përgjigjet”, tha Klosi.
Gjatë hulumtimeve nga media, një tjetër emër i rëndësishëm politik lidhet me dy vëllezërit Nitin dhe Chetan Sandesara, të akuzuar nga autoritetet e vendit të tyre për vjedhjen dhe pastrimin e 725 milionë dollarëve. Përveç Tiranës janë duke ndërtuar në bregdetin e Dhërmiut, konkretisht në kompleksin “Drymades Dream”, i cili po ndërtohet nga biznesmeni Julian Morina dhe kompania “Laxmi Real Estate”, në pronësi të dy vëllezërve Sandesara.
Si parcela prej 4800 metër katrorë ra në dorën e dy vëllezërve indianë?
Saga përmban konflikte gjyqësore, transaksione të shumta dhe dyshime për ndikim pushteti. Në pah del emri i Besnik Dervishit, ish-ministër dhe deputet i Partisë Socialiste, aktualisht komisioner për të drejtën e informimit dhe familjen Ruçi nga Himara.
Përmes ligjit 7501 Spiro Ruçi kishte përfituar rreth 1300 metër tokë në këtë parcelë. Por në fund të vitit 2013, Gjykata e Vlorës i njeh pronësinë edhe për 3500 metra të tjera në parcelën ngjitur, të cilat deri në atë kohë kishin qenë në pronësi të Bashkisë Himarë. Vendimi që tjetërsoi parcelën është marrë 12 dhjetor të vitit 2013, fiks dy muaj pasi Besnik Dervishi ishte emëruar Prefekt i Qarkut të Vlorës. Madje në atë kohë emri i Dervishit doli sërish në media për një tjetër ngjarje. Vetëm dy ditë pas vendimit të gjykatës, makinës së tij ju vu tritol ngjitur me Kryeministrinë, ngjarje të cilat nuk dihet nëse kanë lidhje. Lënda eksplozive iu vu nga vrasësi seria Julian Çela.
Por ajo që dihet e sigurt është fakti se mes Besnik Dervishit dhe familjes Ruçi kishte lidhje, të paktën ekonomike. Në qershor të vitit 2017, kur Dervishi ishte në detyrën e komisionerit për informimin, në konflikt ligjor interesi, ai themelon një shoqëri të përbashkët me Jorgji Ruçin për ndërtimi e kompleksit “Drymades Dream”. Familja Ruçi vendosi si kontribut tokën prej 4800 metër, ndërsa Besnik Dervishi kontribuon me një vlerë monetare 3.7 milionë lekë ose 28 mijë euro. Aksionet e kompanisë ndahen gjysmë për gjysmë.
Besnik Dervishi ia shet pronën Jorgji Ruçit
Por një vit e gjysmë më vonë, në 27 nëntor te vitit 2018, Besnik Dervishi vendos të largohet nga shoqëria. Ai ia shet aksionet e tij Jorgji Ruçit, po me çmimin 3.7 milionë lekë, aq sa kishte kontribuar me para. Menjëherë pas kësaj nisin një sëra transaksionesh ku prona ka ndërruar disa herë duar. Dy javë pas blerjes së aksioneve të Dervishit, Jorgji Ruçi tashmë pronar i vetëm i shoqërisë “Drymades Dream”, e shet kompaninë tek biznesmeni i ndërtimit Juljan Morina, për një çmim prej 200 mijë euro duke u larguar edhe ky nga shoqëria.
Prona u ble nga Juljan Morina
Por as Morina nuk do të mbetej pronari i vetëm i saj. Një muaj pas blerjes së tokës nga Jorgji Ruçi, ai e shet gjysmën e aksioneve tek dy vëllezërit indiane Sandesara për 100 mijë euro. Dy vëllezërit indianë Sandesara dyshohet se kanë përvetësuar dhe më pas pastruar mbi 725 milionë dollarë të marrë përmes kredive nga bankat shtetërore të Indisë. Një pjesë e këtyre parave duket se kanë ardhur në Shqipëri për tu investuar në sektorin e ndërtimit, jo vetëm në ndërtimin e pallateve në tiranë, por edhe resortet luksoze në bregdetin jugor e Shqipërisë.
