Një gomone që transportonte drogë është sekuestruar në brigjet italiane në rajonin e Pulias.
Në pranga ka rënë një shqiptar, i cili ishte në bordin e skafit me drogë. Në mjetin lundrues u gjetën dhe sekuestruan 310 kg marijuanë dhe 24 kg hashash. Lënda narkotike ishte e ndarë në 186 pako.
Sipas autoriteteve italiane, droga do të kapte vlerën e rreth 4 milionë Eurove nëse do të hidhej në treg. Gomonia që transportonte marijuanë ishte 5 metra e gjatë dhe kishte motorë të fuqishëm.
Nuk dihet vendi nga ishte nisur ekzaktësisht skafi, por në operacionin për goditjen e këtij rasti të trafikut ndërkombëtar të lëndëve narkotike është përfshirë edhe policia shqiptare në bashkëpunim me atë italiane.
NJOFTIMI I POLICISE
Strukturat e Guardia di Finanza-s, në bashkëpunim me Policinë Shqiptare kanë realizuar një operacion antidrogë të suksesshëm, në kuadër të të cilit u kapën gjithsej 334 kg drogë (marijuanë), e cila përllogaritet të nxirrte rreth 4 milion euro në tregun e paligjshëm.
Gjatë patrullimit të përbashkët në ujërat shqiptare fillimisht dhe vijimit të patrullimeve nga ana e palës italiane në afërsi të brigjeve të Brindizit, njësitë e Guardia-s kanë pikasur një mjet detar, gomone, e cila ngjallte dyshime për shkak të vendndodhjes. Mjeti lundrues është shoqëruar në port dhe gjatë kontrollit, në një hapësirë të maskuar, janë zbuluar 186 pako të mbështjella, në të cilat ishte fshehur lënda narkotike.
Skafisti, shtetasi shqiptar F. I., 32 vjeç është arrestuar në vendngjarje dhe njëherësh janë kryer procedurat e sekuestrimit të mjetit dhe provave të tjera materiale.
Mjeti lundrues ishte rreth 5 metra i gjatë, me një motor të jashtëm mjaft të fuqishëm.
Operacioni Aero-naval që u zhvillua ditën e djeshme konfirmon efikasitetin e kontrollit detar që ushtrohet nga Guardia di Finanza për të luftuar trafiqet e paligjshme që tentojnë të hyjnë drejt BE-së, sinergjinë me strukturat e Frontex-it, si dhe bashkëpunimin e qëndrueshëm dhe të konsoliduar tashmë me autoritetet e Policisë së Shtetit edhe nëpërmjet zyrave ndërlidhëse në Bari e Durrës.
