Ndryshe nga Lulzim Basha, Kryetari Partisë Agrare Ambientaliste, Agron Duka, ka uruar Partinë Socialiste për fitoren në zgjedhjet e 25 Prillit.
Në një reagim të gjatë në rrjetet sociale, Duka shkruan se ka qenë kundër kreut të PD-së, Lulzim Basha në lidhje me vendimin për djegien e mandateve apo me bojkotimin e zgjedhjeve vendore, por prapë se prapë thotë se ka respektuar vendimmarrjen brenda koalicionit dhe e ka ndjekur Lulzim Bashën. Janë këto gabimet që sipas Agron Dukës i kanë kushtuar humbjen opozitës në zgjedhjet e 25 Prillit.
Duka bën thirrje që opozita të korrigjohet brenda vetes. Si kryetar i PAA-së, Duka merr përsipër gabimet e bëra dhe uron që PD-ja me Lulzim Bashën të nxjerrin mësimet e duhura nga humbja.
Postimi i plotë i Agron Dukës:
E nis këtë qëndrim duke uruar Partinë Socialiste për fitoren në zgjedhjet e 25 Prillit.
Në jetë jam rrëzuar shumë herë, por jam ringritur po aq herë. Kam dërmuar gjunjët, por nuk më ka lejuar zemra të thyhem. E kam bërë për herë të parë në zgjedhjet e 2005-ës kur isha i pari kandidat socialist që u ndjeva fitimtar duke njohur kundërshtarin si fitues.
E kam bërë gjithmonë në këto vite dhe do të vazhdoj ta bëj sërish si pjesë e një morali që tenton të gjejë arsye dhe të drejtë edhe tani mbas 25 prillit, sepse jam i bindur se suksesi i mundshëm i qeverisjes së rikonfirmuar të Edi Ramës nuk është medalje për të, por një e mirë publike.
Njëlloj siç jam i bindur se dështimin e Edi Ramës në qeverisje nuk e vuan kryeministri që është një funksion i përkohshëm, por qytetari shqiptar, pjesë e një shoqërie
“Nëse humbësi nuk ka forcën morale t’i japë dorën fituesit është i dënuar të humbasë përsëri”.
E kam ndjekur Lulëzim Bashën edhe kur nuk kam patur të njëjtin mendim, nuk kam qënë në asnjë moment dakort me djegjen e mandateve, as me bojkotimin e zgjedhjeve vendore por prapë së prapë kam respektuar gjithnjë vendimmarrjen brenda koalicionit.
Këto vendime të gabuara na kushtuan shumë. Nuk mund të fajësojmë kundërshtarin politik përse përfitoi nga gabimet tona, por përkundrazi, duhet të korrigjohemi për të mos i përsëritur ato në të ardhmen edhe pse unë i kam konsideruar të gabuara ato vendime e jam dakordësuar me ndërgjegje të plotë dhe për këtë fajësoj veten dhe jo të tjerët
“Na vodhën, na shtypën, na sakatuan, prandaj do vazhdojmë avazin e vjetër”, kjo nuk është strategji pozitive për Ne, por më këtë le të merret drejtësia.
Nuk dua të diktoj mendimin Tim, por si Kryetar i PAA duke shprehur edhe mendimin e Kryesisë së PAA, marr përsipër gabimet e bëra dhe i uroj kundërshtarit politik suksese në qeverisjen e ardhshme.
Dëshiroj me gjithë zemër që Partia Demokratike dhe Lulëzim Basha të nxjerrin mësimet e duhura nga kjo humbje dhe të fitojnë në ndeshjen e rradhës.
Urojmë fituesit për katër vitet e ardhshme dhe të punojmë të gjithë bashkë për një opozitë të fortë e konstruktive duke udhëhequr vendin në proçeset integruese.
PAA do jetë në shërbim të fermerëve, blegtorëve, agro-përpunuesëve pra në shërbim të té gjithë shtresave për të cilat PAA ekziston si force politike.
Faleminderit dhe mirënjohje të thellë të gjithë atyre që më besuan dhe votuan duke u zotuar që do të jem me ta dhe për ta deri në fund pa asnjë rezervë.
Agron Duka
