4 anëtarët e familjes Gushi janë përcjellë këtë të shtunë në banesën e fundit. Eduart Gushi, 44 vjeç; bashkëshortja e tij Silvana, 33 vjeçe dhe dy vajzat e çiftit, Anastasia dhe Eva, 14 dhe 9 vjeçe, humbën jetën në aksidentin tragjik të së premtes në Vlorë.
Mes dhimbjes e lotësh, e ëma e Silvana Gushit ka përcjellë sot për në banesën e fundit të bijën dhe dy mbesat, Evën dhe Anastasian.
Pamjet trishtuese tregojnë të ëmën e Silvanës të veshur me të zeza, e cila duket se nuk mund të qëndrojë dot në këmbë nga dhimbja, ndërsa thërret me të madhe ‘o lulet e nënës çfarë më bëtë’!
Familja nga Patosi u përplas nga një makinë luksoze Audi që drejtohej nga 22-vjeçari Igli Madani, i arrestuar pas ngjarjes. Ata udhëtonin me një makinë Toyota dhe si pasojë e aksidentit u rrokullisën disa herë derisa përfunduan në një kanal.
Përplasja për 4 anëtarët e familjes Gushi ishte fatale pasi humbën jetën menjëherë në vendin e ngjarjes. U desh ndërhyrja e zjarrfikësve për të nxjerrë trupat e pajetë nga automjeti.
Familja Gushi jetonte në Greqi. Ata ishin kthyer në Shqipëri dhe në momentin e aksidentit po udhëtonin për në jug për të kaluar pushimet verore.
