Situata e krijuar rreth pandemisë së koronavirusit, ka bërë që edhe projektet bashkiake të ndërpriten përkohësisht. Në një përgjigje kundrejt akuzave të opozitës, i pari i bashkisë së Tiranë, Erion Veliaj, u shpreh për TvT, se sipas vendimit të Agjencisë së Prokurimit Publik, të gjitha projektet para situatës së pandemisë, janë shtyer pa afat, dhe se opozita përmes akuzave, po bën një betejë bajate.
“Prokurimet janë ndaluar që pardje, opozitës i ka humbur sensi i kohës, nga dje kemi vetëm prokurime emergjente, projektet që kanë qenë para kësaj situate janë ndërprerë. Një tjetër lajm i rremë për Gardën, opozita kur ka qenë në pushtet, kur kanë pas e kanë bërë rrush ë kumbulla, ata ngatërrojnë çfarë është bërë janar e shkurt, me çfarë u bë tani, është një betejë bajate”, u shpreh Veliaj, në një lidhje të drejtpërdrejtë me TvT, duke përgënjeshtruar sipas tij, faktin se sipas PD, te Kopshti Zoologjik, do të ketë kulla, sipas projektit te bashkisë.
Kryetari i bashkisë, lidhur me situatën e koronavirusit, u shpreh në përkrahje të vendimit të KM për faljen e qirave për bizneset e vogla nga ana e bashkisë.
“Të gjitha lokalet dhe dyqane fruta perimesh marrin me qira hapësira. Vendimi ynë shkon për ata që nuk kanë pasur punë. Vendimi i KM për bizneset që janë të vogla është vendimi i duhur. Zëre se është një muaj që e kanë pasur qiranë bosh. Nëse mendoni që sakrificat ti bëjë shteti, hajde ta bëjmë të gjithën me subvencione. Dalja e vendimit të qeverisë noterizoi atë që shpirti tirons e bëri”.
Veliaj, bëri të ditur po ashtu se janë anuluar pagesat e qirave të banesave sociale të cilat janë nën administrimin e bashkisë për muajin mars dhe prill, dhe në rast nevoje, do të falet edhe muaji maj.
Në këtë komunikim të drejtpërdrejtë, kryetari Veliaj, u zotua se deri në përfundim të situatës emergjente që lidhet me koronavirusin, i gjithë lidershipi i bashkisë do të punojë pa të drejtë page mujore.
