Të ardhurat e Apple kanë rënë 5% tre muajt e fundit të vitit të kaluar, në 117.2 miliardë dollarë, një rënie e rrallë për kompaninë dhe dukshëm më e keqe nga pritshmëritë e analistëve të Wall Street.
Kjo rënie shënon herën e parë që Apple raporton ulje të të ardhurave vjetore që nga viti 2019. Fitimet e prodhuesit të iPhone gjithashtu pësuan rënie me më shumë se 13% krahasuar me tremujorin e një viti më parë.
Aksionet e Apple ranë deri në 4% pas orarit të mbylljes së të enjtes.
Fitimet zhgënjyese vijnë pasi Apple u përball me mbylljen e një fabrike kyçe në Kinë në fund të vitit të kaluar, duke dëmtuar furnizimin e saj. Dhe kjo vjen mes shqetësimeve që konsumatorët mund të reduktojnë shpenzimet e tyre për pajisjet e shtrenjta të teknologjisë ndërsa frika e recesionit po afrohet. Apple ka marrë gjithashtu një goditje nga inflacioni i lartë dhe normat e interesit.
“Si rezultat i një mjedisi sfidues, të ardhurat tona ranë me 5% nga viti në vit, por unë jam krenar për mënyrën se si ne kemi përballuar rrethanat e parashikuara dhe të papritura të viteve të fundit”, tha CEO Tim Cook ditën e enjte gjatë një telefonate me analistët për të diskutuar rezultatet.
Cook tha se tre faktorët që ndikuan në ecurinë e të ardhurave këtë tremujor ishin drejtimet e ndryshueshme të këmbimit valutor, sfidat e lidhura me COVID-19 në Kinë, që ndikuan në furnizimin e iPhone 14 Pro dhe iPhone 14 Pro Max, si dhe “mjedisi sfidues makroekonomik”.
Cook vuri në dukje se “bota vazhdon të përballet me rrethana të papritura, duke nisur nga inflacioni te lufta në Europën Lindore, e deri te ndikimet e forta të pandemisë”.
Apple “nuk është imune” ndaj këtyre sfidave, tha Cook.
Megjithatë, kompania vuri në dukje se sasia e pajisjeve Apple në të gjithë botën arrin në më shumë se 2 miliardë. Cook e quajti këtë “një moment historik vërtet të jashtëzakonshëm”.
Apple tha gjithashtu se biznesi i saj i shërbimeve, një fushë e rëndësishme e viteve të fundit, që përfshin Apple TV+ dhe lojërat, arriti një rekord të të ardhurave tremujore prej 20.8 miliardë dollarësh. Kjo është 6% më shumë nga tremujori i një viti më parë, por një ngadalësim i theksuar i rritjes krahasuar me atë prej gati 24% të shpallur një vit më parë.
“Apple paraqiti një raport befasues të fitimeve” – tha në një deklaratë analisti i Investing.com, Jesse Cohen. Tremujori i dobët i Apple dëshmon se edhe kompania më e vlerësuar në SHBA nuk është imune ndaj sfidave me të cilat përballet industria e teknologjisë në përgjithësi.
CFO i Apple, Luca Maestri, tha se kompania nuk po jep udhëzime për të ardhurat për tremujorin e ardhshëm duke pasur parasysh “pasigurinë e vazhdueshme në të gjithë botën në periudhën afatshkurtër”.
Megjithatë, Maestri tha se kompania pret që ecuria e të ardhurave nga viti në vit për tremujorin e parë të 2023, të jetë “e ngjashme me atë e dhjetorit”. /CNN Business
