Një atentat me pasojë 3 viktima dhe 1 të plagosur ka ndodhur mbrëmjen e djeshme në lagjen nr.3 në Memaliaj në lokalin e shtetasit K.K. rreth orës 23:20.
Sipas informacioneve paraprake, raportohet se objektiv i atentatit ka qenë Shyqyri Kalemi (babai i Andrea dhe Zamir Kalemit), i cili ka mbetur i vrarë. Viktimë ka mbetur dhe Marsel Çela, 47 vjeç (lidhje shoqërore e viktimave), si dhe kamarieri i lokalit, Gledi Muka, 36 vjeç. I plagosur ka mbetur Artur Kalemi, 57 vjeç, (vëllai i Shyqri Kalemit), i cili është transportuar në spital për të marrë ndihmë mjekësore.
Ngjarja dyshohet të ketë ndodhur për hakmarrje si pjesë e sagës së ngjarjeve të ndodhura që prej 11 Qershorit të vitit 2022 kur mbeti i vrarë në Tiranë me shpërthim të telekomanduar Aleksandër Sadikaj.
Nga veprimet e para hetimore dyshohet se autorët menjëherë pas ngjarjes janë larguar me shpejtësi në drejtim të Mallakastrës me një automjet tip BMW, që është gjetur i djegur paraditen e sotme në fshatin Bejaj, Mallakastër.
Shumë pranë vendit ku është djegur mjeti, dyshohet t’i jetë vënë flaka dhe një lokali. Sipas informacioneve paraprake, ka dyshime se në atentat janë përfshirë 3 persona, njëri prej tyre ka dalë nga automjeti dhe ka qëlluar me breshëri kallashnikovi drejt objektivit të tyre, Shyqyri Kalemit.
Janë sekuestruar kamerat e sigurisë të disa bizneseve përgjatë gjithë rrugës ku ka ndodhur atentati i mbrëmshëm dhe gjithashtu është sekuestruar dhe kamera e sigurisë e Bashkisë së Memaliajt, e cila kap drejtpërdrejt vendin ku ka ndodhur krimi dhe kanë qenë të ulur 3 viktimat.
Grupi i posaçëm hetimor në drejtimin e Prokurorisë dhe me ekspertë të Departamentit të Policisë Kriminale vijon punën në vendngjarje për sqarimin e rrethanave të ngjarjes, identifikimin dhe kapjen e autorit/ëve.
TË VRARË:
1. Shyqyri Kalemi, 74 vjeç (objektivi i atentatit, babai i Andrea dhe Zamir Kalemit),
2. Marsel Çela, 47 vjeç (lidhje shoqërore me viktimat),
3. Gledi Muka, 36 vjeç (kamarier në lokalin ku ndodhi atentati).
I PLAGOSUR:
Artur Kalemi, 57 vjeç.
