Kryetari i Partisë Demokratike, Lulzim Basha, ka reaguar lidhur me ndryshimet që pësoi kabineti qeveritar në mbledhjen e Asamblesë Kombëtare të PS.
Basha shprehet se këto lëvizje të Ramës, nuk do të mund të shpëtojnë qeverinë e tij nga problemet me drejtësinë dhe korrupsionin.
“Qeveria e damkosur nga SPAK për aferën e inceneratorëve nuk i shpëton dot drejtësisë me tubime partiake ku bashkë i bën vetëm frika e ndëshkimit prej zullumeve që kanë bërë në kurriz të shqiptarëve”, shkruan ai.
Në të njëjtën kohë, kryedemokrati kërkon që drejtësia të vijojë të ndëshkojë të korruptuarit, pa u ndikuar nga presioni politik.
“Drejtësia duhet të vijojë punën e saj për hetimin e aferës së inceneratorëve, sterilizimit dhe çdo denoncimi për korrupsionin shtetëror në çdo hallkë. E pandikuar nga presioni qeveritar apo politik i kujtdo qoftë. Kjo është mënyra e vetme për të vënë para drejtësisë abuzuesit me pasuritë e shqiptarëve dhe bashkëpunëtorëve të tyre që e kanë lënë Shqipërinë peng të Edi Ramës”, shkruan ai.
Më herët, lidhur me ndryshimet në kabinetin qeveritar reagoi edhe kreu i grupit Parlamentar të PD, Gazment Bardhi. Ky i fundit i quajti këto ndryshime si makiazh për korrupsionin e qeverisë.
“Korrupsioni, i cili qëndron në themelet e kësaj qeverie, do të vazhdojë të gërryejë mirëqenien në çdo familje shqiptare. Nuk ka pikën e rëndësisë se cilin ministër ndryshon Edi Rama. Është thjesht një makiazh për fytyrën e kalbur nga korrupsioni të kryeministrit”, shkruan Bardhi.
