Lideri i Partisë Demokratike, Lulzim Basha, ka postuar videon e një një interviste, ku i është rikthyer marrëdhënies së tij me themeluesin e partisë, ish-presidentin dhe ish-kryeministrin e vendit, Sali Berisha.
Berisha gjatë takimeve publike të ”Foltores”, e ka akuzuar Bashën edhe për prerje të besës. Një akuzë, kjo, që lideri demokrat refuzon.
“Të vetmen besë që kam lidhur me Sali Berishën, që ditën e parë që i kemi dhënë dorën njëri-tjetrit kur kam qenë vetëm 17 vjeç, ishte për angazhimin dhe përkushtimin tim pa asnjë kusht për demokracinë, për Partinë Demokratike, për demokratët, për Shqipërinë. E njëjta besë ka qenë edhe në 2005, kur u angazhova me gjithë forcat e mia për fitoren e Partisë Demokratike, e më pas për përmbushjen e projekteve që ndryshuan njëherë e përgjithmonë Shqipërinë, të cilat i rikthyen dinjitetin shqiptarëve”.
“Wshtë një nga sulmet më të ulëta që është bërë në këto 2 muaj nga Sali Berisha. Nuk ka patur kurrë një besë midis meje dhe Sali Berishës për t’i rënë me shkelm sakrificës së demokratëve nëse cenohej interesi i njërit apo i tjetrit, për të mbrojtur shpinën e njërit apo të tjetrit. Me Sali Berishën na ka lidhur një tjetër besë nëse mund ta them këtë. Besa e vlerave euroatlantike, që na çoi dhe e çoi Shqipërinë në NATO”, janë fjalët e tij.
Basha shtoi se “që pas 9 shtatorit gjithkush është shtangur nga etiketimet që Sali Berisha ka bërë ndaj meje. Natyrisht unë nuk kam ndërmend të shkel mbi vitet e bashkëpunimit me të, në të mirë të shqiptarëve dhe Shqipërisë”.
