Tekste falas për 3500 nxënës dhe pagë jo më pak se 700 euro për mësuesit, premtoi kreu demokrat, Lulzim Basha, në prezantimin e programit elektoral të arsimit për zgjedhjet e 25 prillit. Kryedemokrati premtoi rritje të pagave me 50% për pedagogët, duke u siguruar atyre paga prej 900 Eurosh në muaj dhe profesorëve paga prej 1300 Euro.
Basha garantoi ndryshimin e gjërave, ndërsa tha se plani i punës i PD-së është kryer nga ekspertë të njohur dhe synon përmirësimin e të ardhmes së vendit.
“Tekste shkollore të reja falas për 350 000 nxënës”
Basha tha se arsimi është baza e shoqërisë dhe si i tillë suksesi i fëmijëve është suksesi i vendit. Kryedemokrati u angazhua në sigurimin e teksteve shkollore për 350 mijë nxënës. Po ashtu sa i përket arsimit parauniversitar Basha tha se do të rriten rrogat e mësuesve me 60%. Sipas tij mësuesit nuk do të marrin më pak se 700 Euro në muaj.
“Angazhohem se do të sigurojmë tekste shkollore të reja falas për 350 000 nxënës. Po kështu fëmijët e të gjitha familjeve në nevojë do të përfitojnë paketa shkollore dhe tekste falas gjatë gjithë arsimit parauniversitar. Ne nuk do të lëmë asnjë fëmijë pa ndihmuar. Ne do të rrisim me 60% pagat e mësuesve dhe as edhe një mësues nuk do të marrë më pak se 700 Euro në muaj rrogë. Kështu ne do sjellim më shumë të ardhura dhe mirëqenie për 35 000 familjet e mësuesve tanë të arsimit parauniversitar”, tha Basha.
Basha tha se qeveria nën drejtimin e tij do të ofrojë një program passhkollor dhe ushqim për orët shtesë. “Ky program do ti mbajë fëmijët të sigurt në shkollë dhe larg rrugës”, tha Basha ndërsa shtoi se asnjë nxënës nuk do të lihet pas dore dhe të diskriminohet.
Bursa të plota
Sa i përket arsimit të lartë, Basha tha se do të japë bursë të plotë për çdo student që vjen nga familje me të ardhura nën 64 000 Lekë.
“Do të japim bursë të plotë për çdo student që vjen nga familje me të ardhura nën 64 000 Lekë. Dhe gjysmë-bursa (50%) për studentët nga familje me të ardhura mbi 64 000 Lekë”, tha Basha. Ai premtoi një hartimin e një programi arsimor modern edhe për ata që duan një profesion. Për studentët e shkëlqyer tha se do të investohen për t’u dërguar në universitetet më të mira të botës. Nëse bëhet kryeministër, u angazhua për një ligj të ri për arsimin e lartë.
“Unë angazhohem se do garantoj pavarësinë e universiteteve dhe lirinë e nevojshme akademike, duke e miratuar menjëherë sapo të zgjidhem kryeministër ligjin e ri për arsimin e lartë, në bashkëpunim me akademikët, specialistët më të mirë e vetë studentët”, tha Basha.
Rritja e pagave
Kryedemokrati premtoi rritje të pagave me 50% për pedagogët, duke u siguruar atyre paga prej 900 Eurosh në muaj dhe profesorëve paga prej 1300 Euro.
“Do të rrisim pagat me 50%, duke ju garantuar pedagogëve paga prej 900 Eurosh në muaj dhe profesorëve paga prej 1300 Euro. Grante për Institucionet Publike të Arsimit të Lartë, për modernizimin e infrastrukturës fizike e pedagogjike. Ofrimi i arsimit të lartë të digjitalizuar, me investim në vlerën 40 milionë dollarë, me fokus laboratorët e parqet e teknologjisë së informacionit, zona me internet falas dhe pajisje të teknologjisë së informacionit”, tha Basha.
